ჩვენი ურთიერთობები ძალიან მაღალ დონეზეა და ევროპის რეკონსტრუქციისა და განვითარების ბანკი (EBRD) უფრო და უფრო მეტად ენდობა საქართველოს მთავრობას და მის ეკონომიკურ პოლიტიკას, – ამის შესახებ აღმოსავლეთ ევროპასა და კავკასიაში ევროპის რეკონსტრუქციისა და განვითარების ბანკის ახალმა მმართველმა დირექტორმა, მატეო პატრონემ საქართველოს პრემიერ-მინისტრ მამუკა ბახტაძესთან შეხვედრისას განაცხადა.
მთავრობის ადმინისტრაციის ინფორმაციით, საუბარი შეეხო ევროპის რეკონსტრუქციისა და განვითარების ბანკთან ერთობლივად განხორციელებულ პროექტებს და ევროპის რეკონსტრუქციისა და განვითარების ბანკის, როგორც საქართველოსთვის ძლიერი პარტნიორის და დონორის როლს ქვეყნის განვითარების პროცესში.
ყურადღება გამახვილდა პროექტებზე, რომლებში ინვესტირებას ევროპის რეკონსტრუქციისა და განვითარების ბანკი მომავალში გეგმავს. როგორც პრემიერ-მინისტრმა აღნიშნა, ყველა პროექტი, რომელიც ევროპის რეკონსტრუქციისა და განვითარების ბანკის მხარდაჭერით ხორციელდება, ქვეყნის განვითარებისთვის პრიორიტეტულია და ხელს უწყობს საქართველოს რეგიონულ ჰაბად და ეკონომიკურ ცენტრად ჩამოყალიბებას.
შეხვედრისას, საუბარი შეეხო ევროპის რეკონსტრუქციისა და განვითარების ბანკის ინტერესს საჯარო სექტორში ინვესტიციების განხორციელების მიმართულებით.
მთავრობის მეთაურმა ასევე ხაზი გაუსვა მატეო პატრონეს წინამორბედის, ბრუნო ბალვანერას წვლილს საქართველოში წლების განმავლობაში მნიშვნელოვანი საინვესტიციო პორტფელის შექმნაში, რისთვისაც მას განსაკუთრებული მადლობა გადაუხადა.