ფინანსთა მინისტრმა ივანე მაჭავარიანმა ანაკლიის პროექტის შეფერხებასთან დაკავშირებით კომენტარი გააკეთა. „მე გამოვრიცხავდი, რომ ანაკლიას უკავშირდებოდეს, პირიქით, ანაკლიის პროექტის შემთხვევაში ხელისუფლება მაქსიმალურად მხარს უჭერს ამ პროექტის განვითარებას. არანაირი კავშირი არ აქვს, დარწმუნებული ვარ ამაში. ამავდროულად, მინდა გითხრათ, რომ ეს ანაკლიას და საკუთრივ თიბისი ბანკს და საფინანსო სისტემას საქართველოში არ ემუქრება არანაირი საფრთხე“, – განაცხადა მაჭავარიანმა.
„იყო კონკრეტული ტრანზაქცია და კონკრეტული შეკითხვები და მე მჯერა, რომ ზუსტად ამ ტრანზაქციის შესახებ იქნება პასუხი გასაცემი და მეტი არაფერი. მე მგონია, რომ ანაკლიის პროექტი ცალკე მდგომი მნიშვნელოვანი მასიური პროექტია და ინვესტორების გადაწყვეტილება, მიიღონ თუ არა მონაწილეობა, მხოლოდ და მხოლოდ იქნება გამომდინარე იქიდან, რამდენად თვითონ ეს პროექტი იქნება გამართლებული“, – აღნიშნა მაჭავარიანმა.
კომენტარი გააკეთა ასევე ინფრასტრუქტურის მინისტრმა მაია ცქიტიშვილმა. „მე დიდი სურვილი მექნებოდა, რომ გავმიჯნოთ ორი საკითხი ერთმანეთისგან. ერთი არის ანაკლიის პორტის მშენებლობა და ამ მიმართულებით როგორც კონსორციუმის, ისე საქართველოს მთავრობის რამდენიმე ძირითადი სტრუქტურის მიერ აქტიური თანამშრომლობა, კომუნიკაცია, დრო და მხარდაჭერა ამ პროექტის და მეორეს მხრივ, ის კვლევა და საგამოძიებო მოქმედებები, რომელიც ეხება უშუალოდ თიბისი ბანკთან დაკავშირებულ კონკრეტულ გარიგებას. მე ამ ორ საკითხს, რა თქმა უნდა, ერთმანეთთან არ დავაკავშირებდი“, – აღნიშნა ცქიტიშვილმა.
