ცნობადი ადამიანების კომენტარები – რა იციან საქართველოში არსებული ინტელექტუალური საკუთრებისა და საავტორო უფლებების დაცვის შესახებ?
კობა დავითაშვილი – მაღალ დონეზეაო, ვერ იტყვი და არც გამიგია ამ საავტორო უფლებების დაცვის შესახებ არაფერი.
ელიზბარ ჯაველიძე – არის რაღაცა სააგენტო, რომელიც იცავს საერთოდ პატენტებს, ჰოდა, რაც შეეხება ინტელექტუალური საკუთრების დაცვას კონკრეტული სააგენტოს შესახებ, არაფერი მსმენია.
ომარ ნიშნიანიძე – მსმენია და ვიცი კიდეც საავტორო უფლებების დაცვის შესახებ. რამდენიმე გადაცემაც კი მიეძღვნა ტელევიზიით ამ თემას. ადრეც წამიკითხავს ამის შესახებ. ეს ბოლო პერიოდია აღარაფერი ვიცი. კონკრეტულად სააგენტოს ვერ დაგისახელებთ, მაგრამ კონკრეტული უფლებადამცველები რომ არიან ამ კუთხით, ეს ნამდვილად ვიცი.
ხათუნა ლაგაზიძე – არაფერი მსმენია, თუმცა, ვფიქრობ, რომ იქნება რაღაც სახელმწიფო სტრუქტურა, სადაც შესაძლებელია უფლებების რეგისტრაცია…
მამუკა არეშიძე – არ ვიცი ეგ საკითხი საერთოდ…
ვახტანგ მაისაია – ინტელექტუალურ საკითხებზე მე თვითონ ვატარებდი ლექციებს, და მე შემოვიტანე ამაზე საკითხები ზოგადად. რამდენადაც ვიცი, შეიქმნა სახელმწიფო სტრუქტურა, რომელიც უწევს ინტელექტუალურ და საავტორო უფლებების დაცვას კოორდინირებას. თუ იქნებოდა ასევე ანალოგიური კიდევ ერთი დამატებითი სტრუქტურა, ცუდი არ იქნებოდა. ეს არის პარიზის ქარტიის მოთხოვნა ჯერ კიდევ მე-19 საუკუნეში თუ არ ვცდები, რომელიც ინტელექტუალურ საკუთრებას არეგულირებს.
ჯაბა სამუშია – როგორც ვიცი, არსებობს საავტორო უფლებების სააგენტო და ხელოვნების მიმართულებით მუშაობენ, რომელთანაც მე შეხება არ მქონია, მაგრამ რამდენადაც მსმენია და წამიკითხავს კიდეც, იყო ხოლმე გარკვეული პროტესტები მომღერლების მხრიდან, სიმღერების შესრულებასთან დაკავშირებით. რა ჰქვია სააგენტოს, არ ვიცი, მაგრამ რომ არსებობს, ნამდვილად ვიცი.
გიორგი ახვლედიანი – სიმართლე გითხრათ, არაფერი მსმენია და არაფერი ვიცი ამ საკითხის შესახებ.
გიორგი აბდალაძე – კი, მსმენია საავტორო უფლებების დაცვის შესახებ, თუმცა, თავად დასახელება საავტორო უფლებების ორგანიზაციის ნამდვილად არ ვიცი.
ლალი აფციაური – ამ საკითხებით მე არ ვარ დაინტერესებული და როგორც ასეთი, ინტელექტუალური საკუთრების დაცვის სააგენტო თუ არსებობს, არ გამიგია. ვინმე თუ რამე უფლებას იცავს, სახელი ხომ მაინც უნდა გეუბნებოდეს რამეს? შესაბამისად არაფერი მსმენია, ვერაფერს გეტყვით.
გია ბურჯანაძე – კი, მსმენია საავტორო უფლებებისა და ინტელექტუალური საკუთრების დაცვასთან დაკავშირებით. მახსოვს, რომ საუბრობდნენ ამ უფლებების დაცვის შესახებ, მაგრამ კონკრეტულად რომელი პირები და ორგანიზაცია, არ მახსოვს.
ირმა ინაშვილი – ვიცი, მსმენია საავტორო უფლებების დაცვის შესახებ და თვითონ ორგანიზაციაც ვიცი. როცა ვიყავი ტელეკომპანია „ობიექტივის“ ხელმძღვანელი, ერთხელ მქონდა შეხვედრა მის ხელმძღვანელობასთან, ქართული ფილმების და მუსიკალური ნაწარმოებების განთავსება მინდოდა ეთერში და მაშინ მქონდა შეხვედრა.
ნანა დევდარიანი – საავტორო უფლებების დაცვის ორგანიზაციის შესახებ ვიცოდი, რომ ადრე არსებობდა, ახლა ნამდვილად არ ვიცი…