ცნობადი ადამიანების კომენტარები – რა იციან საქართველოში არსებული ინტელექტუალური საკუთრებისა და საავტორო უფლებების დაცვის შესახებ?
ლალი მოროშკინა – არაფერი ვიცი, არ მსმენია…
ნინელი ჭანკვეტაძე – ვერაფერს გიპასუხებთ, არაფერი მსმენია…
ქეთი დოლიძე – როგორ არა, გამიგია, არის საავტორო უფლებათა დაცვის ეროვნული სააგენტო, გიგა კობალაძის ხელმძღვანელობით, სადაც მეც ვმუშაობდი.
ჯემალ ღაღანიძე – ვერ გეტყვით მაგას, არ მსმენია და არც კონკრეტული სააგენტო ვიცი, რომელიც იცავს საავტორო უფლებებს. ეს საკითხი ზოგადად მოსაგვარებელია. ვიცი, რომ საჭირო და გამოსასწორებელი საქმეა.
ავთანდილ ცქვიტინიძე – ინტელექტუალური საკუთრებისა და საავტორო უფლებების დაცვის შესახებ ნამდვილად არ მსმენია. არ ვარ ამ საკითხში კომპეტენტური, თუმცა, გეტყვით, რომ მოხარული ვიქნები, მსგავს სააგენტოს თუ გააკეთებენ.
სოფო ხალვაში – არსებობს ასეთი კომპანია, გიგა კობალაძის ხელმძღვანელობით, რომელთანაც მქონია ურთიერთობა, მაგრამ რომ გითხრათ, კარგად აქვს ფეხი მოკიდებული-თქო, არა. ზოგადად უნდა არსებობდეს ინტელექტუალური საკუთრებისა და საავტორო უფლებების დაცვის ისეთი სააგენტო, რომელიც უფრო უკეთესად იმუშავებს. ქვეყანას ნამდვილად სჭირდება ასეთი ორგანო.
გია ბაღაშვილი – კი მსმენია და არსებობს კიდეც საავტორო უფლებების სააგენტო, რომლის წევრიც ვარ და ვთანამშრომლობ კიდეც. ძალიან დიდი საქმე აქვთ მათ გაწეული და ძალიან მნიშვნელოვან საქმეს აკეთებენ. ამ კუთხით მუშაობს სწორედ გიგა კობალაძის ორგანიზაცია, რომელიც მნიშვნელოვანია ქვეყნის განვითარებისთვის, რისი მიხედვითაც საერთაშორისო ვალდებულებები გვაქვს აღებული. ზოგადად ქვეყნაში განვითარების ხარისხს წარმოაჩენს ის, თუ რამდენად იცავს ქვეყანა საავტორო უფლებას.
ირმა სოხაძე – მე თვითონ ვარ ასოციაციის წევრი, რომელსაც გიგა კობალაძე ხელმძღვანელობს. მე ლექსების ავტორი ვარ, მუსიკის ავტორი ვარ და ასობით სიმღერა მაქვს და, რა თქმა უნდა, ვიქნები საავტორო უფლებების ასოციაციის წევრი.
ლიზა ბაგრატიონი – კი, როგორ არა, მსმენია და ვიცი კიდეც საავტორო უფლებების დაცვის ასოციაციის შესახებ და „დიდძალ ფულსაც ვიღებ, ისე, რომ თან ხარჯვასაც ვერ ავუდივარ“. ყოველ შემთხვევაში მაინც სასიამოვნო ფაქტია, რომ არსებობს ასეთი ორგანიზაცია და გაწევრიანებული ვარ და ვიღებ კიდეც გარკვეულ თანხას. ასოციაციას, რომლის წევრიც ვარ, გიგა კობალაძე ხელმძღვანელობს.
მაკა ზამბახიძე – არაფერი მსგავსი არ ვიცი. უმჯობესია, პროდიუსერს დაურეკოთ, იმიტომ, რომ ამ საკითხში არ ვარ ღრმად ჩახედული და ამიტომ ვერ გაგცემთ პასუხს.
ჯაბა კილაძე – რა კითხვაა საერთოდ? რას ჰქვია, არ მსმენია, როგორ შეიძლება ამხელა კაცს საავტორო უფლებების შესახებ არ მსმენოდეს? არ მინდა საერთოდ ამ თემაზე საუბარი, არ მცალია.
მარინა კახიანი – მსგავსი სააგენტოს შესახებ არაფერი მსმენია და არც ის ვიცი, ვინ იცავს საქართველოში საავტორო უფლებებს.
მერაბ კოკოჩაშვილი – მე თვითონ ვარ საავტორო უფლებების დაცვის წევრი, სადაც შესანიშნავი ურთიერთობა მაქვს და კმაყოფილი ვარ მათი მუშაობით. სააგენტოს, რომელთანაც მე ვთანამშრომლობ, გიგა კობალაძე ხელმძღვანელობს.
ეკა მამალაძე – დიახ, გაწევრიანებული ვარ საავტორო უფლებების დაცვის სააგენტოში, რომელსაც გიგა კობალაძე ხელმძღვანელობს.
ბაკურ ბაკურაძე – საავტორო უფლებების დაცვის ორგანიზაციის შესახებ მსმენია რაღაც, რომ არსებობს, მაგრამ მე მათთან არაფერი ურთიერთობა არ მაქვს. რაც შეეხება კონკრეტულად საქმიანობისა და სააგენტოს ხელმძღვანელის შესახებ თუ ვინ არის, საერთოდ არ მაქვს წარმოდგენა.
დავით ოქიტაშვილი – ჯერჯერობით ერთი სააგენტოა და ვიცი, რომ ახლა მეორე ალტერნატივა გაჩნდა… ამ თემაზე არ მინდა საუბარი, მე რომ ამ თემაზე ვისაუბრო, სხვა რაღაცა მოჰყვება, ეს მომღერლების გადასაწყვეტია. მე მხარს ვუჭერ მომღერლებს, მათი გადასაწყვეტია, რომელ ორგანიზაციას აირჩევენ. შესაბამისად, ვინც უკეთეს პირობებს შესთავაზებს, მას დაუჭერენ მხარს.