ამირან გამყრელიძე: ტყვიასთან დაკავშირებით ვერცერთი კვლევით ვისაუბრებთ, თუ რა ხდება ქვეყანაში

დაავადებათა კონტროლის ეროვნული ცენტრის დირექტორი, ამირან გამყრელიძე ამბობს, რომ ტყვიის შემცველობასთან დაკავშირებით ყველა კვლევა სწრაფი მეთოდითაა ჩატარებული. მისივე განმარტებით, ეს იმას ნიშნავს, რომ, ამ კუთხით კონკრეტულად რა მდგომარეობაა ქვეყანაში, ვერ დადგინდება. “ჯერჯერობით, არცერთი კვლევა ტყვიასთან დაკავშირებით არ არის რეპრეზენტატული, ანუ ეს არ არის იმ მეთოდოლოგიით ჩატარებული, რომლის მიხედვითაც ჩვენ ვისაუბრებთ, თუ რა ხდება ქვეყანაში ამ პრობლემაზე. ეს კვლევები, ძირითადად, სწრაფი მეთოდითაა ჩატარებული, მაგრამ თუ იქ მომატებულია ტყვიის მაჩვენებელი, სხვა აპარატზე უნდა გადამოწმდეს”, – განაცხადა ამირან გამყრელიძემ.
ცნობისათვის, ტყვიის შემცველობაზე მასშტაბური კვლევა სამეცნიერო ინსტიტუტების, არასამთავრობო ორგანიზაციებისა და რიგითი მოქალაქეების ერთობლივი ძალისხმევით ჩატარდა, რა დროსაც ყოველდღიური მოხმარების 300-მდე საგანი შეისწავლეს. კვლევის თანახმად კი, თითქმის, ყველა ნიმუში დაბინძურებულია.