“სავიზო რეჟიმის არარსებობა არ ნიშნავს იმას, რომ ეს სავიზო რეჟიმი უნდა დაარღვიოს მოქალაქემ”, – საქართველოს საგარეო საქმეთა სამინისტროს ოფიციალურმა წარმომადგენელმა, ვლადიმერ კონსტანტინიდიმ ბარსელონაში საქართველოს მოქალაქეების დაკავებასთან დაკავშირებით განაცხადა.
“არაერთხელ გავაკეთეთ განცხადება იმასთან დაკავშირებით, რომ სავიზო რეჟიმის არარსებობა არ ნიშნავს იმას, რომ ეს სავიზო რეჟიმი უნდა დაარღვიოს მოქალაქემ. კონსულტაციები მიღებული აქვთ, არაინფორმირებულობასთან არ გვაქვს საქმე, სამწუხაროდ, ვიცით იქ, რომ არიან ადამიანები, ვისაც მცირეწლოვანი ბავშვები ჰყავთ თან, რაც ცუდია, ნეგატივია ამ კუთხით. თუმცა, ჩვენს საკონსულოს ყველაფერი აქვს გაკეთებული იმისთვის, რომ ეს ადამიანები გაფრთხილებულები ყოფილიყვნენ სავიზო რეჟიმის დარღვევის შესაძლო შედეგებზე. კონსული ახლაც, ამ წუთშიც, ჩართულია. აქტიურად მუშაობს. პირველი პრიორიტეტი მისთვის დაკავებული ადამიანებია, მათი ჯანმრთელობის, უფლებების მდგომარეობა”, – განაცხადა საქართველოს საგარეო საქმეთა სამინისტროს ოფიციალური წარმომადგენელმა, ვლადიმერ კონსტანტინიდიმ.
სპეცოპერაცია ესპანეთის შინაგან საქმეთა სამინიტროს თანამშრომლებმა ბარსელონას სკოლის მიტოვებულ შენობაში გუშინ ჩაატარეს. აღნიშნულ ტერიტორიაზე ქართველი ემიგრანტები მას შემდეგ შესახლდნენ, რაც ესპანეთმა მათ თავშესაფარზე უარი უთხრა და ქუჩაში დარჩნენ.
სპეცოპერაციისას 11 ქართველი დააკავეს. დაკავებულებს გამოძიება ბინის ქურდობასა და ორგანიზებულ დანაშაულში მონაწილეობას ედავება.
“ჩვენმა საკონსულომ ყველაფერი გააკეთა, რომ ეს ადამიანები გაფრთხილებულები ყოფილიყვნენ სავიზო რეჟიმის დარღვევის შესაძლო შედეგებზე”
2019/04/05 17:22:50
კომენტარები
ნანახია: 524 ჯერ