დიღმის მასივში აფეთქების შედეგად დაზარალებულ მოქალაქეებს დროებითი საცხოვრებლით დიდუბის გამგეობა უზრუნველყოფს. ამის შესახებ დიდუბის რაიონის გამგებელმა ირმა ზავრადაშვილმა თქვა. გამგებლის თქმით, ახლა დაზარალებულების სიას ადგენენ და ისინი დღის განმავლობაში სასტუმროებში გადანაწილდებიან.
რაც შეეხება დაზიანებულ კორპუსს, ამ ადგილზე მარადიორობის ფაქტების თავიდან აცილების მიზნით, 24 საათის განმავლობაში დაცვის სამსახური დაიცავს.
აფეთქების შედეგად რამდენიმე ადამიანი დაშავდა, მათ შორის 7 თვის ბავშვი. აფეთქების შედეგად დაშავებული პირებიდან ღუდუშაურის კლინიკაში ამ დროისთვის 3 ადამიანია, მათგან ერთ-ერთი დაშავებული მიხაილოვის სახელობის კლინიკიდან გადაიყვანეს.
დიღმის მასივის მე-4 მიკრორაიონში აფეთქება რამდენიმე საათის წინ მოხდა. მომხდარზე გამოძიება 240-ე მუხლით დაიწყო.