ბუნებრივი აირის შედეგად გაჟონვა და შემდეგ აფეთქება დღეს თბილისში, დიღმის მასივის ერთ-ერთ საცხოვრებელ კორპუსში, მესამე სართულზე მოხდა. შემთხვევის შედეგად 8 ადამიანი დაშავდა, ისინი საავადმყოფოში გადაიყვანეს.
დაშავებულებიდან ერთი მალევე გაეწერა, 7 კი მკურნალობას აგრძელებს, მათ შორის ერთი ბავშვია, 7 თვის. დაშავებულებს შორის შედარებით მძიმე მდგომარეობა აქვს 21 წლის ახალგაზრდას, რომელსაც სხეულის 35%-იანი დამწვრობა აქვს. ყველა დაშავებული კონტაქტურია.
აფეთქება მესამე სართულზე მოხდა, აფეთქების შედეგად კი ფაქტიურად სამი ბინა “გაერთიანდა”. დღეს მაშველებმა ბინის გარე კედელი უსაფრთხოების მიზნით მოხსნეს. აფეთქების ადგილზე, კორპუსში დენისა და გაზის მიწოდება შეწყვეტილია.
ბინა, რომელშიც აფეთქება მოხდა, გუშინ გაქირავდა და გუშინ შევიდა პირველად ოჯახი იქ საცხოვრებლად, თუმცა უცნობია დარჩნენ თუ არა ისინი ღამე.
კორპუსში მცხოვრები 21 ოჯახიდან 8 ღამეს ახლობლებთან გაათევს, დანარჩენი კი დიდუბის რაიონის გამგეობამ ქირით სასტუმროში გაიყვანა. მიმდინარეობს ზარალის შესწავლა.
მოქალაქეების თქმით, მათ სადარბაზოში გაზის სუნი იგრძნეს და “ყაზტრანსგაზში” დარეკეს. კომპანიის ცნობით, შეტყობინების შესვლიდან 5 წუთში ჯგუფი გამოძახებაზე გავიდა, 16 წუთში კი შემთხვევის ადგილზე იყო უკვე მისული. ისინი ადგილზე აფეთქებიდან მხოლოდ ერთი წუთის შემდეგ მივიდნენ.
“ყაზტრანსგაზის” ცნობით, მხოლოდ მარტში 29105 კუსტარულად დამონტაჟებული დანადგარი ჩახსნა კომპანიამ.
მომხდარზე გამოძიება 240-ე მუხლით დაიწყო.