“დავით ბაგრატიონ-მუხრანელმა საქართველოდან გაქცევამდე, შუადღეზე, ანა ბაგრატიონ-გრუზინკის დაურეკა. ის ცრემლებამდე აღელვებული იყო, ისტერიკულად მოითხოვდა ანასგან, რომ მათი შვილისთვის, გიორგისთვის კარგად ეპატრონა” ,- ამის შესახებ ანა ბაგრატიონ-გრუზინსკის ადვოკატმა, ლევან გორელაშვილმა მედიაჰოლდინგ „კვირას“ პრესკლუბში გამართულ პრესკონფერენციაზე განაცხადა.
ადვოკატის თქმით, დედის ჯანმრთელობის მდგომარეობა დავით ბაგრატიონმა ქვეყნის დატოვების საბაბად გამოიყენა.
„მართალი ადამიანები არ გარბიან, რჩებიან და საკუთარ სიმართლეს ამტკიცებენ. თუმცა, ამ ადამიანმა გაქცევაზე გააკეთა არჩევანი. გაცხადებული მიზეზი საკუთარი დედის ჯანმრთელობის მდგომარეობის შესახებ არის გამოგონილი საბაბი. ეს ქალბატონი 77 წლის არის და არ არის გამორიცხული, მართლა ცუდად იყოს. დავითისა და ანას თანაცხოვრების პერიოდშიც ხშირად ავადმყოფობდა და, რამდენიმე წლის წინ, ახალი წლების პერიოდში მართლა ძალიან ცუდად იყო. დავითს აქვს ნათქვამი ანასთავის, იმდენად ავად არის, აპარტზეა მიერთებული და, სავარაუდოდ, ავადმყოფობას ვერც გადაიტანსო. რატომღაც, მაშინ არ გასჩენია ამ ადამიანს სურვილი, მომაკვდავი დედა მოენახულებინა ესპანეთში და როცა გამოძიება დაიწყო, მაშინ გაუჩნდა მზრუნველი შვილის იმიჯის მორგების სურვილი და წავიდა დედის სანახავად. ეს არის გამოგონილი საბაბი, რომ საზოგადოებას აუხსნან ეს გაქცევა. გარდა ამისა, როცა მისი ადვოკატისგან, ბატონი ლევან ჩხეიძისგან გახდა ცნობილი, ეს ქალბატონი შუაღამეს გახდა ცუდად და შუაღამესვე წავიდა დავითი ესპენეთში მაშინ, როდესაც შუადღეს დავითი დაუკავშირდა ანას მობილურ ტელეფონზე. ეს ჩემთვის ცნობილი გახდა არა უშუალოდ ანას მოყოლის შედეგად, არამედ პირადად ვიყავი შემსწრე, რომ დავითმა ანას დაურეკა მობილურით. ეს იყო უცნაური, რადგან ისინი ზარებით არ კონტაქტობენ უკვე საკმაო პერიოდია. პირადად მოვისმინე ეს საუბარი. საუბარი იყო ძალიან უცნაური . იგი იყო ძალიან აღელვებული, ცრემლებამდე აღელვებული ისტერიულად მოითხოვდა ანასგან, რომ მათი შვილისთვის, გიორგისთვის კარგად მოევლო, კარგად ეპატრონა, რაც უცნაური იყო მისი მხრიდან. ფხიზელ მდგომარეობაში მყოფს ნამდვილად არ ჰგავდა. არ პასუხობდა ანას შეკითხვებს. არაფერი უხსნებია საკუთარი დედის ჯანმრთელობის მდგომარეობის შესახებ. საუბრის ბოლოს გამოემშვიდობა ანას, ეს არ იყო ჩვეულებრივი დამშვიდობება, ეს იყო გამომშვიდობება, თითქოს, მეორედ ამ ადამიანს ცხოვრებაში ვეღარ ნახავდა. ამან მინიშნება მოგვცა, რომ ამ ადამიანს ჯერ კიდევ შუადღეზე განზრახული ჰქონდა საქართველოს დატოვება. ჩვენი ინფორმაციით, მის მიერ ავიაბილეთების შეძენა დროში მნიშვნელოვნად უსწრებს დედამისის ცუდად გახდომის პერიოდს“, – განაცხადა ადვოკატმა. შეგახსენებთ, დავით ბაგრატიონ-მუხრანელმა საქართველო დატოვა. ამის შესახებ მედიაჰოლდინგ „კვირას“ პრესკლუბში გამართულ პრესკონფერენციაზე მისმა ადვოკატმა, ლევან ჩხეიძემ განაცხადა.
ადვოკატის ინფორმაციით, დავით ბაგრატიონის დედას გულის შეტევა დაემართა. მისი თქმით, ბაგრატიონის ესპანეთში გამგზავრება სწორედ ამას უკავშირდება.
ცნობისთვის, 2 აპრილს ანა ბაგრატონ-გრუზინსკი თბილისის პოლიციის მთავარ სამმართველოში გამომძიებლების შეკითხვებს, დაახლოებით, 6 საათის განმავლობაში პასუხობდა. გამოძიებას 2014 წელს მასზე გახორიელებულ შესაძლო ძალადობის ფაქტთან ჰქონდა კითხვები. ანა ბაგრატიონ-გრუზინსკის ადვოკატების მტკიცებით, მას ფიზიკური დაზიანებები, სავარაუდოდ – ბლაგვი საგნით, ყოფილმა მეუღლემ, დავით ბაგრატიონ-მუხრანელმა მიაყენა. ადვოკატების ინფორმაციით, ამასთან დაკავშირებით სამხარაულის ექსპერტიზის ბიუროს დასკვნაც არსებობს.
წყარო: – “კვირა”