“შორენა ბეგაშვილი, „ნაციონალური მოძრაობის“ დროს, უშიშროებამ დავით ბაგრატიონ-მუხრანელს აგენტად მიუგზავნა”, – ამის შესახებ დავით ბაგრატიონ-მუხრანელის ადვოკატმა, ლევან ჩხეიძემ მედიაჰოლდინგ „კვირას“ პრესკლუბში გამართულ პრესკონფერენციაზე განაცხადა.
„შორენა ბეგაშვილის სახელი, თუ დააკვირდებით, არსად მიხსენებია. ერთხელ მიხსენეს ბეგაშვილი „რუსთავი2-ზე“, იქაც გავეცი პასუხი, რომ შორენა ბეგაშვილი იყო უშიშროებისგან ჩასმული აგენტი. ამის შემდეგ დამიკავშირდა მისი მეუღლე, მთხოვა, ჩემი მეუღლის სახელი აღარ ახსენოო. მე მას ვუთხარი, რომ არანაირი სურვილი გვაქვს ბეგაშვილის სახელის ხსენებისა. თუ არ უნდა, მას რომ მე მისი მეუღლის სახელი ვახსენო, მაშინ რატომ მოდის ქალბატონი შორენა და იძლევა ჩვენებას ჩვენ წინააღმდეგ?
მოგეხსენებათ, მაშინ საუბარი იყო კონსტიტუციურ მონარქიაზე. ლაპარაკი იყო სახელმწიფო წეს-წყობილების ცვლაზე. მე რომ არ ვყოფილიყავი ბატონი დავითის მეგობარი და ვყოფილიყავი სახელმწიფოს მეთაური, მეც ჩავუსვამდი აგენტს. დავითმა პოლიტიკური პროცესი წამოიწყო, საუბარი იყო ქვეყნის კონსტიტუციუი წეს-წყობილების შეცვლაზე და ვინ არის ეს კაცი და რას ფიქრობს, საინტერესო იქნებოდა. შორენა ბეგაშვილმა იმუშავა ბატონი დავითის გაშავებაზე პიარულად. ბატონი დავითის გაშავება იმ დროს შედიოდა იმდროინდელი ხელისუფლების ინტერესებში, რომლებიც კონსტიტუციური მონარქიის იდეას აღიქვამდნენ, როგორც პირად საფრთხეს“, – განაცხადა ადვოკატმა.
დავით ბაგრატიონ-მუხრანელის მიერ შესაძლო ძალადობის საქმეზე, შესაძლოა, ტელეწამყვანი შორენა ბეგაშვილი გამოკითხონ. ამის შესახებ ანა ბაგრატიონ-გრუზინსკის ადვოკატმა, ლევან გორელაშვილმა მედიაჰოლდინგ „კვირას“ პრესკლუბში გამართულ პრესკონფერენციაზე განაცხადა.
რამდენიმე წლის წინ, შორენა ბეგაშვილს ტელეეთერში ნათქვამი აქვს, რომ დავით ბაგრატიონს მისთვის ხელი დაურტყამს.
ცნობისთვის, 2 აპრილს ანა ბაგრატონ-გრუზინსკი თბილისის პოლიციის მთავარ სამმართველოში გამომძიებლების შეკითხვებს, დაახლოებით, 6 საათის განმავლობაში პასუხობდა. გამოძიებას 2014 წელს მასზე განხორიელებულ შესაძლო ძალადობის ფაქტთან ჰქონდა კითხვები. ანა ბაგრატიონ-გრუზინსკის ადვოკატების მტკიცებით, მას ფიზიკური დაზიანებები, სავარაუდოდ – ბლაგვი საგნით, ყოფილმა მეუღლემ, დავით ბაგრატიონ-მუხრანელმა მიაყენა. ადვოკატების ინფორმაციით, ამასთან დაკავშირებით სამხარაულის ექსპერტიზის ბიუროს დასკვნაც არსებობს.