ირაკლი კობახიძის დედა – დღესაც ვამაყობ მამაჩემის, აკადემიკოს მალხაზ ზაალიშვილის გმირობის ტოლფასი გამბედაობით

პარლამენტის თავმჯდომარის, ირაკლი კობახიძის დედა – თამარ ზაალიშვილი სოციალურ ქსელში 9 აპრილის მოვლენებს ეხმიანება.
„ვამაყობ დღესაც მამაჩემის, აკადემიკოს მალხაზ ზაალიშვილის პროფესიონალიზმით, რითაც დადგინდა ყველა გამოყენებული მომწამვლელი ნივთიერება და მისი გმირობის ტოლფასი გამბედაობით!!!“, – წერს ირაკლი კობახიძის დედა, თამარ ზაალიშვილი.
თამარ ზაალიშვილი საქართველოს სსრ უმაღლესი საბჭოს ქალაქ თბილისში 1989 წლის 9 აპრილს მომხდარი ამბების გარემოებათა გამომკვლევი კომისიის ქიმიურტოქსიკოლოგიური ქვეკომისიის მიერ გაწეულ სამუშაოთა დასკვნას აქვეყნებს, სადაც ვკითხულობთ:
„…ჯარების მიერ რესპუბლიკის მშვიდობიანი მოსახლეობის მიმართ გახორციელებული იყო ყოვლად გაუმართლებელი ბარბაროსული აქცია ქიმიური მომწამვლელი ნივთიერებების გამოყენებით, რომელთა გამოყენების არც მორალური, არც იურიდიული უფლება მათ არ ჰქონდათ“.
მალხაზ ზაალიშვილი
ქიმიურ-ტოქსიკოლოგიური ქვეკომისიის თავმჯდომარე
დასკვნა განიხილა და დაამტკიცა საქართველოს სსრ უმაღლესი საბჭოს ქალაქ თბილისში 1989 წლის 9 აპრილს მომხდარი ამბების გარემოებათა გამომკვლევმა კომისიამ (1989 წლის 17 მაისი, ოქმი №6).
გაზეთი „კომუნისტი”. 1989 წლის 23 მაისი.