“ადამიანი, როდესაც დანაშაულს სჩადის, ადრე თუ გვიან მაინც ხვდება ციხეში. გამოუძიებელი და დაფარული არაფერი არ არის. ეს ისეთი საქმე იყო, რომელიც აუცილებლად გაიხსნებოდა”, – ამის შესახებ ე.წ. კანიბალიზმის საქმის მონაწილემ, მსჯავრდებულმა ირმა (მარიამ) ყოჩიაშვილმა “იმედის კვირასთან” ინტერვიუში თქვა.
22 წლის ირმა (მარიამ) ყოჩიაშვილმა ერთ-ერთი ყველაზე სასტიკი მკვლელობის დეტალების შესახებ “იმედის კვირასთან” ისაუბრა. მკვლელობის საქმე რომელიც 2016 წლის 19 ოქტომბრით თარიღდება, იმდენად მძიმე იყო, რომ სასამართლო პროცესი მალევე დაიხურა. დააკავეს 6 ახალგაზრდა. მათგან ორი სასჯელს ჯგუფურად, დამამძიმებელ გარემოებებში, განსაკუთრებული სისასტიკით ჩადენილი განზრახ მკვლელობისთვის იხდის. მათ ირმა ყოჩიაშვილის გამზრდელი დედა 76 წლის ლუბა ყოჩიაშვილი მოკლეს.
ირმა ყოჩიაშვილი ახლა სასჯელს რუსთავის ქალთა კოლონიაში იხდის. “იმედის კვირა” მასთან სწორედ სასჯელაღსრულების დაწესებულებაში მივიდა. როგორც ირმა ყოჩიაშვილი “იმედის კვირასთან” საუბარში ამბობს, გამზრდელი დედა მას ცუდად ექცეოდა და ეს არ იყო მხოლოდ სიტყვიერი შეურაცხყოფა. “მიუხედავად ყველაფრისა, მაინც ვინანიებ დანაშაულს, მაინც მეცოდება გარდაცვლილი ადამიანი. მაქვს სინანული იმის როგორც მოკალი, რა მდგომარეობაშიც აღმოჩნდა, ადამიანს მოუსწრაფე სიცოცხლე, რისი უფლებაც არ გაქვს”, – ამბობს ირმა მკვლელობიდან სამი წლის შემდეგ.
მსჯავრდებულის თქმით, მათ ვერ დაუდასტურეს კანიბალიზმის ბრალდება. ირმა სასაცილოდ მიიჩნევს საზოგადოებაში გაჩენილ მოსაზრებას იმის შესახებ, რომ მკვლელობა გარკვეული რიტუალის მიზნით მოხდა და რომ ის და მასთან ერთად მსჯავრდებულები “რაღაც სექტის წევრები არიან”. იხილეთ ვიდეო