„ნაციონალური მოძრაობის“ დღის წესრიგი იყო არეულობა და დაძაბულობა ზუგდიდში, შემდეგ კი ამ დაძაბულობის და ე.წ. დუღილის მთელს საქართველოზე გადატანა, – ამის შესახებ ზუგდიდში „ქართული ოცნების“ საარჩევნო შტაბის ხელმძღვანელმა, ირაკლი ჩიქოვანმა არჩევნებსა და „ნაციონალურ მოძრაობაზე“ საუბრისას განაცხადა.
„ნაციონალურმა მოძრაობამ“ არჩევნების დაწყებისთანავე იცოდა, რომ ეს არჩევნები ჰქონდა წაგებული და მისი დღის წესრიგი არ ყოფილა არჩევნების ჩატარება. მათი დღის წესრიგი იყო არეულობა და დაძაბულობა ზუგდიდში, შემდეგ კი ამ დაძაბულობის და ე.წ. დუღილის მთელს საქართველოზე გადატანა. ეს პროექტი არ განხორციელდა, ვერ განხორციელდება და შესაბამისად ისინი, რა თქმა უნდა, უკმაყოფილოები იქნებიან ამ ყველაფრით“, – განაცხადა ირაკლი ჩიქოვანმა.
მისივე თქმით, მისაღებია პროტესტის ნებისმიერი ფორმა, რომელიც დემოკრატიულ სახელმწიფოში დამკვიდრებული პრაქტიკაა.
„პროტესტის ნებისმიერი ფორმა, რომელიც არის დამკვიდრებული პრაქტიკა დემოკრატიულ სახელმწიფოში, ამასთან მიმართებაში ჩვენ არანაირი პრობლემა არ გაგვაჩნია. თუმცა, მე მგონია, რომ პროტესტი რომ იყოს რელევანტური, ამას უნდა ჰქონდეს ადეკვატური საფუძველი და საზოგადოების მხარდაჭერა. დღეს ყველა კარგად ვხედავთ, რომ ზუგდიდში ჩატარდა არჩევნები მშვიდ გარემოში, დაძაბულობის ფონზე, რა თქმა უნდა, მაგრამ არსებითი დარღვევები არ ყოფილა“, – განაცხადა ირაკლი ჩიქოვანმა.