სამგორის რაიონის დამოუკიდებელი მაჟორიტარი დეპუტატობის კანდიდტმა და ვეტერანების საქმეთა სახელმწიფო სამსახურის ყოფილმა ხელმძღვანელმა, ირაკლი შიხიაშვილმა დღეს პარლამენტს აღნიშნული მოთხოვნით ოფიციალურად მიმართა და დღესვე საკანონმდებლო ორგანოში ოფიციალური წერილიც შეიტანა.
მისი მოთხოვნაა, აუდიტმა 2012-2016 წლებში ვეტერანთა სახელმწიფო დეპარტამენტში ვეტერანების ბიუჯეტის ხარჯვის მიზნობრიობა გამოარკვიოს. ეს სწორედ ის პერიოდია, როცა სამსახურს თავად ხელმძღვანელობდა.
„მინდა, საზოგადოებას ვაცნობო იმის შესახებ, რომ როდესაც მე ვთხოვე პარლამენტარებს დღის წესრიგში შეეტანათ აუდიტის სამსახურში გეგმა-გრაფიკის ცვლილება, იმასთან დაკავშირებით, რომ აუდიტს შეესწავლა ჩემი მუშაობის პერიოდში ბიუჯეტის ხარჯვითი ნაწილი, საკანონმდებლო ორგანომ ჩემი თხოვნა არ გაითვალისწინა. მაგრამ დღეს მაქვს ცოტა განსხვავებული თხოვნაც და მოთხოვნაც, როგორც სამგორის რაიონის მაჟორიტარი დეპუტატობის დამოუკიდებელ კანდიდატს.
დღეს, პარლამენტს ოფიციალურად მივმართავ წერილობით, იმასთან დაკავშირებით, რომ შემოწმდეს 2012 წლის დეკემბრიდან 2016 წლის აპრილამდე – ჩემი მუშაობის პერიოდის დასრულებამდე, ვეტერანების სამსახურში ბიუჯეტის ხარჯვითი ნაწილი“, – აღნიშნა ვეტერანტა სამსახურის ყოფილმა ხელმძღვანელმა.
მისივე თქმით, მისი მუშაობის პერიოდში ვეტერანების სამსახურის ბიუჯეტი მილიონნახევარიდან 8 მილიონამდე გაიზარდა.
როდესაც გავხდი ვეტერანთა სამსახურის დირექტორი, ბიუჯეტი იყო მილიონნახევარზე ოდნავ მეტი, როდესაც მე წამოვედი 8 მილიონამდე იყო გაზრდილი ბიუჯეტი. ბიუჯეტის გაზრდა ასე უბრალოდ არ ხდება. ჩვენ წარვუდგინეთ მთავრობას საინტერესო პროექტები, დავასაბუთეთ ჩვენი მოთხოვნების სისწორე და აუცილებლობა. ამის შემდეგ მივიღეთ პრემიერისგან და მთავრობის წევრებისგან მხარდაჭერა და დავიწყეთ იმ საქმის კეთება, რაც სჭირდებოდათ ვეტერანებს“, – განაცხადა ირაკლი შიხიაშვილმა.