ანანურის კომპლექსის ცალკეული არეალები ტურისტებისთვის დაიკეტება

ანანურის არქიტექტურული კომპლექსის ცალკეული არეალები ტურისტული ჯგუფებისთვის დაიკეტება, – ამ ინფორმაციას კულტურული მემკვიდრეობის დაცვის ეროვნული საგენტო ავრცელებს.
„უსაფრთხოების ნორმების უზრუნველყოფისა და ძეგლთა დაცვითი პრინციპებიდან გამომდინარე, უწყებათშორისი სამუშაო ჯგუფის გადაწყვეტილებით, რომელიც კულტურული მემკვიდრეობის დაცვის ეროვნულ სააგენტოს, ტურიზმის ეროვნულ ადმინისტრაციას, მცხეთა-მთიანეთის სახელმწიფო რწმუნებულის ადმინისტრაციას, დუშეთის მუნიციპალიტეტის თვითმმართველობასა და საქართველოს საპატრიარქოს წარმომადგენლებს აერთიანებს, ანანურის არქიტექტურული კომპლექსის ცალკეული არეალები ტურისტული ჯგუფებისთვის დაიკეტება.
მხარეთა საერთო შეთანხმებით, ვიზიტორებისთვის შეიზღუდება გვიანი შუასაუკუნეების დროინდელი ეროვნული კატეგორიის ძეგლის ის სივრცეები, რომლებზეც ქაოსური გადაადგილების შედეგად, არქიტექტურული სტრუქტურის მექანიკურმა დაზიანებებმა ინტენსიური ხასიათი მიიღო. უწყებათაშორისი სამუშაო ჯგუფის დღევანდელი შეთანხმების თანახმად, მხარეებს შორის გადანაწილდება წინასწარ განსაზღვრული ვალდებულებები, რაც ანანურის კომპლექსზე ფართომასშტაბიანი სარეაბილიტაციო და ინფრასტრუქტურული მოწყობის პროექტის განხორციელებამდე პრევენციულ ნორმებს უზრუნველყოფს. კულტურული მემკვიდრეობის დაცვის ეროვნული სააგენტო ძეგლზე წინასარეაბილიტაციო მოსამზადებელი პროცესის ფარგლებში კრიტიკულ უბნებზე დამცავ ზრუდეებსა და საინფორმაციო მანიშნებს მოაწყობს. ტურიზმის ეროვნული ადმინისტრაციის საინფორმაციო მხარდაჭერის საფუძველზე, ტურისტული კომპანიები და გიდები დაგეგმილი შეზღუდვის შესახებ სათანადო ცნობებს მიიღებენ. ადგილობრივი თვითმმართველობის ადმინისტრაცია კი კომპლექსზე მუდმივ ზედამხედველობას განახორციელებს. დროებითი ღონისძიებებით ანანურის არქიტექტურულ კომპლექსზე ვიზიტორთა ჯგუფების უმართებულო ქმედებები აღიკვეთება.
მომდევნო წლიდან კულტურული მემკვიდრეობის დაცვის ეროვნული სააგენტოს ინიციატივითა და ორგანიზებით ანანურის კომპლექსზე ფართომასშტაბიანი სარეაბილიტაციო პროექტი დაიწყება და ძეგლის კრიტიკულ მდგომარეობაში მყოფ ყველა უბანსა და არქიტექტურულ ნაგებობას მოიცავს. სარეაბილიტაციო პროექტი ძეგლზე ტურისტული ნაკადების გადაადგილების მარშრუტებსაც გაითვალისწინებს, რაც სამომავლოდ ქაოსური ვითარების შექმნის ალბათობას გამორიცხავს.
ანანურის კომპლექსის ტერიტორიაზე ჭარბი ტურისტული ნაკადების მართვის თანამედროვე სტანდარტების დანერგვის პროცესს მნიშვნელოვნად შეუწყობს ხელს ადგილობრივი თვითმმართველობის ორგანიზებით მიმდებარე ტერიტორიაზე დაწყებული ინფრასტრუქტურული კეთილმოწყობის პროექტი, რომელიც ავტოსაპარკინგე მეურნეობის, სავაჭრო პავილიონებისა და გამწვანებული სივრცეების მოწყობას ითვალისწინებს. ახალი ინფრასტრუქტურული სივრცის მშენებლობა წლის ბოლომდე დასრულდება და ის ხარისხობრივად გაამარტივებს სატრანსპორტო საშუალებების გადაადგილებას და სავაჭრო პროცესებს“… – აღნიშნულია კულტურული მემკვიდრეობის დაცვის ეროვნული სააგენტოს მიერ გავრცელებულ ინფორმაციაში.