გია ვოლსკი – პაპუაშვილის პასუხი არის უსუსური, უნიათო

საპარლამენტო უმრავლესობის ლიდერი გია ვოლსკი საკონსტიტუციო სასამართლოს თავმჯდომარის განცხადებას ეხმაურება.
როგორც გია ვოლსკიმ დღევანდელ პრესკონფერენციაზე აღნიშნა, პაპუაშვილის მიერ მთავრობის მიმართ გამოთქმული ბრალდებები უსაფუძვლოა.
მისივე თქმით, არანაირი ნიშანი არ არსებობს იმისა, რომ ხელისუფლება საკონსტუტიცო სასამართლოზე ზეგავლენას ახდენს. დეპუტატს მიაჩნია, რომ ის რაც ხდება „ნაციონალებისა“ და პაპუაშვილის გეგმის ნაწილია.
„ერთი საინტერესო კითხვა იბადება, რითი ვახდენთ ზეწოლას და რატომ არ შეუძლია პარლამენტარს გააკეთოს კომენტარი. ნებისმიერ საქმეში, რომელსაც სასამართლო განიხილავს, პარლამენტი არის მხარე. ამ დღეებში წავიკითხე გიორგი პაპუაშვილის კომენტარი, რომ არავითარი არეულობა არ იგეგმებოდა და არავითარი საკონსტუტიციო კრიზისი ამას არ მოყვებოდა, თუკი გააუქმებდნენ საარჩევნო კოდექსს. 8 ადამიანმა ამას მხარი არ დაუჭირა და რაშია საქმე. თითქოს არ იცის, რომ იქ მეორე საკითხზეც იყო საუბარი, რომელიც ცენტრალური საარჩევნო კომისიის საქმიანობასაც ეხებოდა. მისი პასუხი არის უსუსური, უნიათო. ბოლოს იქამდეც მივიდნენ, რომ პარლამენტარმა ხმა არ უნდა ამოიღოს. მოგწონთ თუ არა პარლამენტარი, ვალდებულია თავისი ამომრჩევლის წინაშე. ჩვენ შევცვალეთ საკონსტუტიციო სასამართლოს კოდექსი, ეს რომ არ ყოფილიყო პირველ კოლეგიას ეძლეოდა ძალიან დიდი ძალაუფლება. მხოლოდ ეს ადამიანები არ უნდა წყვეტდნენ ქვეყნისთვის ძალიან მნიშვნელოვან საკითხებს“, – განაცხადა გია ვოლსკიმ.