ვპირდები „კულას“ დირექტორ ივანე გოგლიძეს – 9 ოქტომბერს წარსდგება სამართლიანი სასამართლოს წინაშე და ვნახავთ, ვის მოენატრება ჟანგბადი, – ასე გამოეხმაურა გორში „ნაციონალური მოძრაობის“ მაჟორიტარი დეპუტატობის კანდიდატი ბადრი ბასიშვილი საწარმო „კულას“ დირექტორის განცხადებას, რომელმაც დაადასტურა, რომ პარტიის ოფისში მინები მან ჩაამსხვრია.
“მინდა მივმართო უწყებათაშორის კომისიას ბიზნესმენის, საწარმო „კულას“ დირექტორის, ივანე გოგლიძის განცხადებასთან დაკავშირებით მიიღოს შესაბამისი ზომები. გუშინ მან საჯაროდ განაცხადა, რომ თვითონ მოიჭრა ჩვენს ოფისში და ჩაამსხვრია მინები. მინდა მივმართო თავად ივანე გოგლიძეს – თავზეც რომ გადაიმტვრიოს მინები, მისი ძმა ალექსანდრე გოგლიძე არ აპირებს კანდიდატუტრის მოხსნას ქალაქში და ჩვენ აცილებლად გავიმარჯვებთ როგორც ქალაქში, ასევე რაიონში.
მინდა მივმართო შინაგან საქმეთა სამინისტროსაც და სამხარეო პოლიციის უფროსსაც, თუმცა რატომღაც არ მაქვს მოლოდინი, რომ ბიზნესმენ გოგლიძის საქციელზე რაიმე რეაგირება იქნება. მე ვპირდები ბიზნესმენ გოგლიძეს, რომ 9 ოქტომბერს აუცილებლად წარსდგება სამართლიანი სასამართლოს წინაშე, ხოლო მისი გამონათქვამები, თითქოს ჩვენს ოფისში სიცხე იყო და გაგრილდა…. ვნახოთ, ვინ ინატრებს 9 ოქტომბერს კარგ ჰაერს და ჟანგბადი ვის მოენატრება“, – განაცხადა ბასიშვილმა.
„ნაციონალური მოძრაობის“ გორის ოფისში დაპირისპირება ორი დღის წინ მოხდა, რის შემდეგაც ოფისის მინები ჩაამსხვრიეს. გუშინ „კულას“ დირექტორმა დაადასტურა, რომ მინები თავად „ჩამოხსნა“, ვინაიდან ოთახში უჰაერობა იყო.
“ნაციონალური მოძრაობის” ოფისში, გარემო და სიტუაცია ძალიან ბუნდოვანი და დახუთული იყო. პრაქტიკულად, ჰაერი არსაიდან არ შედიოდა და ეს პრობლემა უმტკივნეულოდ და ეფექტურად გადავუწყვიტე – მათ მიიღეს სუფთა ჰაერი და მიიღეს ახალი აზრები. თუ ეს დანაშაულია, მზად ვარ, პასუხი ვაგო”, – განაცხადა გოგლიძემ.
ამასთან, მისი თქმით, სრულიად აპოლიტიკურია და არც ერთ ძალას მხარს არ უჭერს.
„მე მყავს უამრავი მეგობარი „ნაციონალურ მოძრაობაშიც“ და სხვა პარტიებშიც, თუმცა საწარმო „კულა“ არც ერთ პოლიტიკურ პარტიას არ აფინანსებს და იგი მხოლოდ სამეწარმეო საქმიანობას ეწევა. აგვისტოს ბოლოს ჩვენ გორში კიდევ ერთი საკონსერვო გადამამუშავებელი საწარმოს გახსნას ვგეგმავთ. ჩვენი საქმიანობა სულ ესაა“, – აღნიშნა გოგლიძემ, რომლის ძმაც „ნაციონალური მოძრაობის“ რიგებიდან არჩევნებში გეგმავს მონაწილეობას. „კულას“ ხელმძღვანელის გაღიზიანებაც, რასაც „ნაციონალების“ პარტიის ოფისში დაპირისპირება მოჰყვა, სავარაუდოდ, სწორედ აღნიშნულ ფაქტს უკავშირდება.