აშშ-ის სახელმწიფო მდივანმა კორუფციის ფაქტების გამოძიების შესახებ თეთრი სახლის მოთხოვნას კიევისადმი გონივრული უწოდა. როგორც Deutsche Welle წერს, ამის შესახებ მაიკ პომპეომ პრესკონფერენციაზე განაცხადა.
„ჩვენ ვცდილობთ უკრაინაში ჩამოვაყალიბოთ გარემო, რომლის პირობებში კორუმპირებული მთავრობა აღარ ინება. კორუფციის ფაქტების გამოძიება აუცილებელია ამერიკული დემოკრატიის დასაცავად და აშშ-ის მიერ გამოყოფილი თანხის სწორად გასანაწილებლად”- აღნიშნა პომპეომ.
როგორც Associated Press-ი წერს, პომპეოს მიერ ნახსენები გამოძიება ეხება როგორც აშშ-ის ყოფილ ვიცეპრეზიდენტ ჯო ბაიდენს, ასევე მის შვილს ჰანტერ ბაიდენს.
პომპეომ ასევე აღნიშნა, რომ აშშ-ის სახელმწიფო დეპარტამენტი კონგრესს ტრამპისა და ზელენსკის სატელეფონო საუბართან დაკავშირებულ დოკუმენტებს გადასცემს.
5 ოქტომბერს ცნობილი გახდა, რომ დემოკრატებმა ტრამპი-ზელენსკის საუბრის დოკუმენტაცია გამოითხოვეს. შესაბამისი მოთხოვნა აშშ-ის პრეზიდენტის იმპიჩმენტის პროცედურას უკავშირდება.
სექტემბერში აშშ-ის დაზვერვის თანამშრომელმა დონალდ ტრამპის წინააღმდეგ საჩივარი დაწერა, რომელიც მისი და ერთ-ერთი უცხოელი ლიდერის საუბარს ეხებოდა. მოგვიანებით აღმოჩნდა, რომ ეს ლიდერი უკრაინის პრეზიდენტი ვოლოდიმირ ზელენსკი იყო.
ჩანაწერის თანახმად, ტრამპმა სატელეფონო საუბრის დროს აშშ-ის ყოფილი ვიცეპრეზიდენტის, ჯო ბაიდენისა და მისი შვილის საკითხი განიხილა. აშშ-ის კონგრესის დემოკრატმა წევრებმა კი გამოთქვეს ვარაუდი, რომ კორუფციასთან ბრძოლის საფარქვეშ ტრამპი უკრაინის ხელისუფლებას თავისი ოპონენტების წინააღმდეგ სისხლის სამართლებრივი დევნის დაწყებას აიძულებდა.
ამის შემდეგ თეთრმა სახლმა პრეზიდენტ დონალდ ტრამპსა და უკრაინის ლიდერ ვოლოდიმირ ზელენსკის შორის 25 სექტემბერს შემდგარი სატელეფონო საუბრის სტენოგრამა (.pdf) გამოქვეყნა. მანამდე კი თავად ზელენსკიმაც დაადასტურა, რომ სატელეფონო საუბრისას ტრამპი მას ბაიდენზე ზემოქმედებისკენ არ უბიძგებდა.
მიუხედავად ამისა, აშშ-ის წარმომადგენელთა პალატის ნაწილმა დონალდ ტრამპის წინააღმდეგ იმპიჩმენტის ფორმალური პროცედურა დაიწყო. აშშ-ის წარმომადგენელთა პალატის გადაწყვეტილებას იმპიჩმენტის შესახებ ამერიკელების 47% მხარს უჭერს.