იუსტიციის უმაღლესი საბჭოს მდივანი, უზენაესი სასამართლოს მოსამართლეობის კანდიდატი გიორგი მიქაუტაძე სასამართლოში რაიმე სახის გავლენიანი ჯგუფების არსებობას უარყოფს. ამის შესახებ მიქაუტაძემ იურიდიულ საკითხთა კომიტეტის სხდომაზე განაცხადა, სადაც უზენაესი სასამართლოს მოსამართლეობის კანდიდატებს უსმენენ. მიქაუტაძეს კითხვა გავლენიანი ჯგუფების არსებობაზე უმრავლესობის დეპუტატმა სოფიო კილაძემ დაუსვა. მიქაუტაძის თქმით, სასამართლოში არის გუნდი, რომელიც ზრუნავს სასამართლო სისტემის დამოუკიდებლობაზე, მიუკერძოებლობასა და სისტემის განვითარებაზე.
„არ არსებობს სასამართლოში არანაირი გავლენიანი ჯგუფი, რომელიც იღებს გარკვეული სახის გადაწყვეტილებას. სასამართლოში არის გუნდი, რომელიც ზრუნავს სასამართლო სისტემის დამოუკიდებლობაზე, მიუკერძოებლობაზე და სასამართლო სისტემის განვითარებაზე. ახალი არ არის არც თქვენთვის, რომ ბოლო პერიოდის განმავლობაში, სასამართლო სისტემას მოუწია ძალიან ბევრი რეფორმის გავლა. ის რეფორმები და საკანონმდებლო ცვლილებები, რომელსაც თქვენ გვთავაზობდით საბოლოო ჯამში, ჩვენი განსახორციელებელია და ეს მარტივი პროცესი არაა. ამ პროცესში არის შემთხვევები, როდესაც ჩვენ გვიწევს სასამართლო სისტემის დამოუკიდებლობის დაცვა და შესაძლებელია ამ პოლემიკაში გაჩნდეს განცდა იმისა, რომ სასამართლო სისტემა გარკვეულწილად შეიძლება ითქვას რომ ჩაკეტილია, მაგრამ ეს ასე არაა. ჩვენ ამას ყველას საქმით ვუდასტურებთ. სასამართლო და იუსტიციის უმაღლესი საბჭო მაქსიმალურად გახსნილია და გადაწყვეტილებები რომლებსაც ვიღებთ, მაქსიმალურად გამჭვირვალეა. ჩვენ ვერ ვიტყვით უარს გადაწყვეტილებების მიღებაზე, იმიტომ, რომ ამას შეიძლება კრიტიკა მოყვეს. სასამართლო საჭიროებს დღევანდელი მდგომარეობითაც ძალიან ბევრი მნიშვნელოვანი ისეთი გადაწყვეტილების მიღებას, რომელზეც წინასწარ ვიცით, რომ შესაძლებელია საზოგადოების გარკვეულ ფენებს ჰქონდეთ კრიტიკული დამოკიდებულება, თუმცა მე ვფიქრობ, რომ პასუხისმგებლობა უნდა აიღოს პირმა, რომელმაც უნდა მიიღოს გადაწყვეტილება“, – განაცხადა გიორგი მიქაუტაძემ.