გია ვოლსკი პაატა ბურჭულაძის პარტიაზე: აქაც „ნაციონალური მოძრაობის“ ხაზი იგრძნობა

პაატა ბურჭულაძის პარტიისგან ლანძღვის და ხმამაღალი განცხადებების გარდა სხვა არაფერი მომისმენია, თუმცა აქაც „ნაციონალური მოძრაობის“ ხაზი იგრძნობა, – ამის შესახებ „ქართული ოცნების“ წევრმა გია ვოლსკიმ განაცხადა.
როგორც ვოლსკიმ ჟურნალისტებთან საუბრისას აღნიშნა, ამ პარტიების ზოგიერთი წარმომადგენელი ფიქრობს, რომ ეს პერიოდი, რაც განვლეს „ნაციონალურ მოძრაობასთან“ ერთად, მათ იმიჯს სერიოზულად აზიანებს, თუმცა წარმოშობის საფუძველი, რა თქმა უნდა, „ნაციონალური მოძრაობიდან“ აქვთ.
„ზოგი „ნაციონალური მოძრაობის“ წიაღიდან დაიბადა, მაგრამ ამ წიაღში გარკვეული დაპირისპირებების გამო არაკომფორტულად იგრძნო თავი. პაატა ბურჭულაძესთან დაკავშირებით, მართალი გითხრათ, ვერაფერს გეტყვით, ლანძღვის და ხმამაღალი განცხადებების გარდა სხვა არაფერი მომისმენია, თუმცა აქაც „ნაციონალური მოძრაობის“ ხაზი იგრძნობა. მესიჯი ბევრია, მაგრამ ხშირ შემთხვევაში საზოგადოების შეცდომაში შეყვანას ითვალისწინებს.
რაღაც კარგი იდეებიც შეიძლება არსებობდეს, მაგრამ წინასაარჩევნო პერიოდი მაინც რაღაც ხმამაღალი განცხადებებით ხასიათდება. ისინი „ნაციონალურ მოძრაობასთან“ მოკავშირეებს უფრო გვანან, ვიდრე მოწინააღმდეგებს. ამიტომ საარჩევნოდ ხმებს წაართმევენ ან გაიყოფენ. მოკლედ კონგლომერატი რაღაც უცნაურია“, – აღნიშნა ვოლსკიმ.