უახლოეს დღეებში ვაპირებ, ჩავიდე კიევში და შევხვდე მიხეილ სააკაშვილს და ვისაუბროთ ჩვენი ქვეყნის სვე-ბედზე, – ამის შესახებ ოპოზიციონერმა პოლიტიკოსმა, გუბაზ სანიკიძემ გადაცემაში “მთავარი აქცენტები” განაცხადა.
“ყველა ერთის წინააღმდეგ” – ესაა გუბაზ სანიკიძის ფორმულა ბიძინა ივანიშვილის წინააღმდეგ. ის ამბობს, რომ აპირებს “ბევრი ტაბუ დაარღვიოს”.
ნიკა გვარამიას კითხვაზე, მხოლოდ საუბრით შემოიფარგლება თუ არა ეს ყველაფერი, ის ამბობს:
“ვნახოთ. ბევრი შეკითხვაა იქიდანაც, აქედანაც”.
სანიკიძის ამ გადაწყვეტილებას საზოგადოების მხრიდან არაერთგვაროვანი შეფასებები მოჰყვა.
შეგახსენებთ, რომ გუბაზ სანიკიძე 2012 წლის საპარლამენტო არჩევნებში კოალიცია „ქართული ოცნების“ სახელით მოხვდა. მაშინ ის პარტია „ეროვნულ ფორუმს“ წარმოადგენდა. 2012 წლის წინასაარჩევნო კამპანიის დროს სანიკიძე აქტიურად უპირისპირდებოდა მიხეილ სააკაშვილის ხელისუფლებას. ამავე პერიოდში სოციალურ ქსელში გავრცელდა ფარული ჩანაწერები, რომლის ერთ-ერთი ფიგურანტი, ოპოზიციის სხვა ლიდერებთან ერთად გუბაზ სანიკიძეც იყო. აღნიშნულ ჩანაწერში ის ფულის შოვნაზე საუბრობს. „ჩვენ ფული უნდა ვიშოვოთ, პოლიტიკა იქნება, არ იქნება მაყუთი უნდა ვიშოვოთ. არც სკამი არ მინდა, არც პრეზიდენტობა მინდა, მაგის დედაც მოვ… ფული უნდა ვიშოვო რა, მილიონერი უნდა გავხდე“, – ამბობს ფარულ ჩანაწერში გუბაზ სანიკიძე.
მოგვიანებით, 2016 წლის საპარლამენტო სიაში ის „ქართული ოცნების“ სიაში ვეღარ მოხვდა, რის გამოც სანიკიძემ ნინო ბურჯანაძის პარტიაში გადაინაცვლა, რამდენიმე თვის წინ კი ეს პარტიაც დატოვა და ამჯერად ირაკლი ოქრუაშვილის პოლიტკური გუნდის წევრი გახდა.