ტერორისტული აქტის საქმეზე დაკავებული ერთ-ერთი პირის, ირაკლი ბაგიშვილის ახლობლის განცხადებით, დაკავებულები უკრაინაში მებრძლებს ეხმარებოდნენ.
როგორც ირაკლი ბაგიშვილის ახლობელმა „რუსთავი 2“-ს განუცხადა, ამის გამო მათ უთვალთვალებდნენ და პრობლემებს უქმნიდნენ.
„ეს ბრალდება სრული აბსურდია. ტერორიზმთან არანაირი კავშირი არ აქვს ირაკლის, არც „ზებოს“. არ ვიცი, ეს რით უნდა იყოს გამოწვეული, მაგრამ ფაქტია, რომ ცუდი და ბინძური თამაშია. საეჭვოდ დაჰყვებოდნენ და უთვალთვალებდნენ მანქანით. ხშირად ამბობდა კიდეც, რომ გრძნობდა, უთვალთვალებდნენ. იყო არაპირდაპირი გაფრთხილებები, ინფორმაციები მოდიოდა, რომ ფორმა გაიხადე და უკრაინასთან ურთიერთობას თავი დაანებეო. ირაკლიც და ვოვაც ეხმარებოდნენ, აგროვებდნენ ფორმებს და რაღაცეებს და უკრაინაში ჯარისკაცებს უგზავნიდნენ, ამასთან დაკავშირებით პრობლემები ჰქონდათ“, – განაცხადა ირაკლი ბაგიშვილის ახლობელმა.