“ჩვენ არაერთხელ გვითქვამს, რომ საქართველო აუცილებლად დადგებოდა ტერაქტების საფრთხის წინაშე. ზუსტი თარიღის დასახელება არ შეგვიძლია, მაგრამ საფრთხე საკმაოდ რეალურია. ამაში გუშინაც დავრწმუნდით, როცა სუს-მა ტერორისტული აქტი აღკვეთა. ეს ფაქტი მისასალმებელია და მინდა ჩვენს სპეციალისტებს ერთი რჩევა მივცე – ყოველთვის გაითვალისწინონ გარე ფაქტორები, არც ერთი ტერორისტული აქტი საქართველოში არ დაგეგმილა და არც მომავალში დაიგეგმება. ყველაფერი მოდის ქვეყნის გარედან. ამ ტერაქტის აღკვეთის შემდეგ, საქართველო ამ საფრთხისგან არ გათავისუფლდება. არის რამდენიმე მიზეზი, რის გამოც საქართველო სერიოზული საფრთხის ქვეშ შეიძლება დადგეს”, – აცხადებს ანალიტიკოსი უსაფრთხოების საკითხებში ზაალ კასრელიშვილი გაზეთ “ახალი თაობისთვის” მიცემულ ინტერვიუში, სათაურით სააკაშვილმა იცის, რომ არეულობის შემთხვევაში აქ მასზე ადრე რუსი შემოვა.
” საქართველო აუცილებლად დადგება ტერაქტების საფრთხის წინაშე თუ ქვეყანა საგარეო პოლიტიკურ კურსს შეცვლის და პრორუსულ პოზიციას დაიკავებს. საფრთხეების მომტანია რუსეთსა და თურქეთს შორის დაწყებული მოლაპარაკეკებიც. თუ ჩვენი ქვეყანა რომელიმე მათგანის მხარეს დაიკავებს, სერიოზული პრობლემები შეიქმნება, რადგან დღეს საქართველოა ერთადერთი ადგილი, სადაც კავკასიელები სტაბილურობას ხედავენ. რაც შეეხება იმას, ეს ტერაქტი ქვეყნის გარეთ დაიგეგმა თუ არა, ამაზე დეტალური და ზუსტი პასუხი გამოძიებამ უნდა გაგვცეს. მანამდე შესაძლოა მხოლოდ ვერსიებზე ვილაპარაკოთ. რაც შეეხება იმ მოსაზრებას, რომ ერთ-ერთი ვერსიით, არაგვის ტერაქტი ოდესაში დაიგეგმა, გამორიცხული არაფერი არ არის. ისიც კარგად ვიცი, რომ მიხეილ სააკაშვილს საქართველოში დაბრუნება ნებისმიერ ფასად უნდა, მაგრამ ამ ეტაპზე საქართველოში ტერაქტების მოწყობა მის ინტერესებში არ შედის. მან შესანიშნავად იცის, რომ სიტუაციის არევის შემთხვევაში, საქართველოში მასზე ადრე რუსი შევა. აი, ამიტომ არ აწყობს ახლა არეულობა”, – აღნიშნავს ანალიტიკოსი.
“ტერაქტი რუსეთ-სომხეთის მაგისტრალური გაზსადენის აფეთქებას ისახავდა მიზნად. აფეთქების შემთხვევაში რუსეთი თავისი ქონების დასაცავად შემოვიდოდა საქართველოში. ეს გაზსადენი მისი საკუთრებაა, ისევე, როგორც არმენგაზი. ჩვენ ამ ეტაპზე არაფრის დამტკიცება არ შეგვიძლია. ტერაქტის მოწყობა რომ რუსეთის ინტერესებში შედიოდა, ეს არის ერთ-ერთი ვერსია. ისე, ეს ტერაქტი, საქართველოს გარდა, ყველას აწყობდა და მას შესაძლოა რამდენიმე მიზანი ჰქონდეს. ვიღაცას შეიძლება ძალიან უნდა, რომ საქართველოს რუსეთთან და სომხეთთან გაურთულდეს ურთიერთობები. ვიღაცას უნდა, რომ საქართველო არასტაბილური ქვეყნის იმიჯით სარგებლობდეს, რაც აქ გამავალ ენერგოპროექტებს კითხვის ნიშნის ქვეშ დააყენებს. რაც შეეხება იმ ფაქტს, რომ გაიჟღერა ვერსიამ, რომ არშემდგარი ტერაქტის უკან, შესაძლოა, ისლამური სახელმწიფო იდგეს, რამდენიმე თვის წინ გამოცახდაეს იმ 60 ქვეყნის სია, სადაც ისინი ტერაქტებს გეგმავდნენ. ამ ჩამონათვალში საქართველო არ იყო. მაშინ ისლამური სახელმწიფოს ერთ-ერთი ლიდერი თარხან ბათირაშვილი ჯერ კიდევ ცოცხალი იყო. სწორედ მისი და კიდევ რამდენიმე ჩვენი თანამოქალაქის დამსახურებაა, რომ საქართველო ამ ჩამონათვალში არ მოხვდა. ახლა ბათირაშვილი ცოცხალი აღარ არის, ისლამური სახელმწიფოშიც რაღაცეები შეიცვალა და არაფერი გამორიცხული არ არის. მას შემდეგ, რაც კოალიციამ ისლამისტებზე სერიოზული შეტევები განახორციელა, ისლამური სახელმწიფოს არმია ასეულებად, ათეულებად და სექტორებად დაიშალა. ყველა საველე მეთაურს, ყველა ათმეთაურს, ასმეთაურსა და სექტორის ხელმძღვანელს მიეცა უფლება, საკუთარი შეხედულებების მიხედვით დაგეგმოს და განახორციელოს ტერაქტები მსოფლიოს ნებისმიერ ადგილას. მათ შორის საქართველოშიც. ეს იმას არ ნიშნავს, რომ გაზსადენის აფეთქება მათ მიერ არის მოწყობილი, თუმცა გამორიცხული არაფერი არ არის. ჩვენ არც იმას გამოვრიცხავთ, რომ საქართველოში რომელიმე სხვა ქვეყნის სპეცსამსახურმა განახორციელოს ტერაქტი და შემდეგ ის ისლამურ სახელმწიფოს დააბრალოს”, – დასძენს რესპონდენტი და კითხვას – “რაღაც ისე ხდება, რომ საქართველოში ტერაქტების აღკვეთა წინასაარჩევმოდ ხდება ხოლმე. ამაზე რას იტყვით?“, – პასუხობს:
“ეჭვს არც ფერი აქვს და არც ხორცი. ეჭვები რომ გაიფანტოს, ძალიან სერიოზული გამოძიება უნდა ჩატარდეს. ისე, არ არის გასაკვირი, რომ ვიღაცას საქართველოში არჩევნების წინ სიტუაციის არევა სურდეს. ქვეყნის გარეთ ბევრს უნდა, რომ ჩვენს ქვეყანას არასტაბილური ქვეყნის იმიჯი ჰქონდეს. დაინტერესებული არიან იმითაც, რომ არჩევნები მშვიდ ვითარებაში არ ჩატარდეს. არჩევნების წინ და მის შემდეგაც ცხელი პერიოდი დაგვიდგება.”