მომავალ პარლამენტს მოუწევს მუშაობა, რათა საარჩევნო სისტემა გასწორდეს,-ამის შესახებ საქართველოს პარლამენტის ვიცე-სპიკერმა, მანანა კობახიძემ საარჩვენი ოლქების გაერთიანების საკითხის კომენტირებისას განუცხადა.
„ჩვენ მოგვიწია ამ ცვლილებების განხორციელება, რათა თითოეული ამომრჩეველის ხმა, დეპუტატის მანდატის წონა ყოფილიყო თანაბარი, ეს მოთხოვნა ქონდათ საერთაშორისო ორგანიზაციებს, იგივე დაგვიდგინა საკონსტიტუციო სასამართლომაც. რა თქმა უნდა, ჩვენ მივიღეთ ფაქტობრივი რეალობა, რომ მესტიას, ლენტეხს, ცაგერს, ონს ყავს ერთი მაჟორიტარი. გარკვეულწილად ეს ქმნის უხერხულობას“,-აღნიშნა მანანა კობახიძემ.
ვიცე-სპიკერის თქმით, ეს წუხილები და უხერხულობა რომ აღარ იყოს, ამიტომაც მოხდა ინიცირება, რომ 2020 წლის არჩევნები ჩატარდეს პროპორციული წესით.
„ალბათ მომავალ პარლამენტს მუშაობა მოუწევს, რომ გავასწოროთ სისტემა, რომელიც შესაძლოა, მთლად სამართლიანი არ არის. როდესაც საუბარია ოლქების გაერთიანებაზე. ალტერნატივა არ გვქონდა, გამომდინარე იქიდან, რომ შევინარჩუნეთ მაჟორიტარული სისტემა ამ არჩევნებისთვის და შესაბამისად ყველა მანდატს უნდა ქონოდა თანაბარი წონა“,-აღნიშნა მანანა კობახიძემ.