რატი იონათამიშვილი საქართველოს პრემიერის, გიორგი გახარიას შეფასებას გამოეხმაურა, რომელმაც ამერიკელი კონგრესმენების წერილზე ისაუბრა.
„ვფიქრობ, რომ გიორგი გახარიას განცხადება ღირსეული და სახელმწიფოებრივი იყო. განცხადებაში ასევე, საუბარი იყო იმაზე, რომ მიუხედავად ცალკეული კრიტიკული მოსაზრებებისა, რომელიც შეიძლება იყოს გარკვეულად ტენდენციური, ჩვენ გვჯერა, ოთხიდან თითოეული კონგრესმენი არის ჩვენი ქვეყნის გულშემატკივარი. ამიტომ, ჩვენთვის მნიშვნელოვანია, თითოეულ კონგრესმენთან გვქონდეს აქტიური თანამშრომლობა, მივაწოდოთ ინფორმაცია და ამ ინფორმაციის საფუძვლზე დარწმუნებულები ვართ, რომ გამოიტანენ ობიექტურ დასკვნებს, რაც ჩვენთვის ნიშნავს პოზიტიურ დასკვნებს. შეხვედრები უახლოეს მომავალში გაიმართება აშშ-ში“, – განაცხადა ფრაქცია „ქართული ოცნების“ თავმჯდომარემ.
რატი იონათამიშვილის თქმით, ამერიკელი კონგრესმენებისთვის ინფორმაციის მიმწოდებელი ერთადერთი წყარო იყო ოპოზიცია.
„ერადერთი წყარო იყო ამ შემთხვევაში ოპოზიცია. ფაქტობრივად ფორმულირებებშიც ჩანს, რადგან შეიცავს არაერთ უზუსტობას. მიუხედავად ამისა, ჩვენთვის მნიშვნელოვანია თანამშრომლობა და ცხადია, ჩვენ ამ თანამშრომლობას გავაძლიერებთ. ჩვენთვის მნიშვნელოვანია, თითოეული ჩვენი საერთაშორისო პარტნიორი, მათ შორის კონგრესმენები, ადეკვატურ და სწორ ინფორმაციას ფლობდნენ“, – განაცხადა რატი იონათამიშვილმა.