გია ვოლსკი პოლიციელზე მფარველობის ფაქტს გამორიცხავს

საპარლამენტო უმრავლესობის წევრი გია ვოლსკი სამტრედიაში ახალგაზრდა მამაკაცის დემურ სტურუას თვითმკვლელობამდე მიყვანაში ბრალდებულ პოლიციელზე მფარველობის ფაქტს გამორიცხავს.
როგორც დეპუტატმა საკითხის კომენტარებისას აღნიშნა, გამოძიებამ აჩვენა, რომ არსებობს სერიოზული მტკიცებულებები და, მიუხედავად იმისა, ადამიანი მიმალვაში იმყოფება თუ არა, პასუხისგება აუცილებლად მოუწევს.
„არიან დამნაშავეები, დამნაშავე ადამიანები, მათ შორის საზღვარგარეთ წასულები, რომელთა დაკავება დღემდე ვერ ხერხდება და მე მახსოვს ის ადამიანები, რომლებიც იმყოფებოდნენ მიმალვაში და ადრე თუ გვიან, აუცილებლად დააკავებენ. ვერ გეტყვით, მომხდარზე რეაგირება დროული იყო თუ არა, მე ვფიქრობ, რომ არ შეიძლება მყისიერად იქნას დაკავებული ის ადამიანი, რომლის მიმართაც ბრალდება არსებობს. გამოძიებამ აჩვენა, რომ არსებობს სერიოზული მტკიცებულებები და მიუხედავად იმისა, ადამიანი მიმალვაში იმყოფება თუ არა, პასუხისგება აუცილებლად მოუწევს“, – განაცხადა გია ვოლსკიმ.
დემურ სტურუას თვითმკვლელობამდე მიყვანაში ბრალდებული გოდერძი თევზაძე მიმალვაში იმყოფება.
პროკურატურა მასზე ძებნის გამოცხადებას აღმკვეთი ღონისძიების შეფარდების შემდეგ გეგმავს. საქალაქო სასამართლო ბრალდებულისთვის აღმკვეთი ღონისძიების შეფარდების საქმეზე დღეს იმსჯელებს.