არც ტრანსადრიატიკულ და არც ტრანსანატოლიურ გაზსადენს არაფერი არ ემუქრება, რადგან უკვე ყველაფერზე კონტრაქტებია გაფორმებული,– ამის შესახებ ჟურნალისტებს საქართველოს პრემიერ-მინისტრმა, გიორგი კვირიკაშვილმა აზერბაიჯანში ვიზიტის დასრულების შემდეგ განუცხადა.
ჟურნალისტები დაინტერესედნენ, რუსეთსა და თურქეთს შორის მიმდინარე მოლაპარაკებები, ხომ არ იქონიებს გავლენას სხვა ენერგეტიკულ პროექტებზე.
„უკვე ყველაფერი დაკონტრაქტებულია, როგორც ინფრასტრუქტურის მშენებლობა, ისე გასატარებელი გაზის მოცულობა, მოპოვებიდან დაწყებული, რეალიზაციით დამთავრებული. ყველაფერი დალაგებულია. ამიტომ, ამ სურთს ვერაფერი ვერ შეცვლის“,- აღნიშნა გიორგი კვირიკაშვილმა.
რაც შეეხება რუსეთისა და თურქეთის შემაერთებელი გაზსადენის საკითხს, პრემიერმა აღნიშნა, რომ ეს საკითხი ჯერ საბოლოოდ გარკვეული არ არის.
“ვნახოთ, როგორ განვითარდება მოლაპარაკებები რუსეთსა და თურქეთს შორის. ჯერჯერობით რაიმე კონკრეტულის პროგნოზირება შეუძლებელია“, – განაცხადა გიორგი კვირიკაშვილმა.