“ნაციონალების“ “ზონდერები“ ქვეყანაში დესტაბილიზაციას მაისის თვიდან გეგმავენ

“ნაციონალური მოძრაობის“ რაიონული ორგანიზაციების ხელმძღვანელებმა იმ ჯგუფების დაბარება დაიწყეს, რომლებიც 2012 წლის 1 ოქტომბერს, არასასურველი შედეგის დროს გამოსაყენებლად, სხვადასხვა ადგილას ჰყავდათ განლაგებული, – ამის შესახებ ექსპერტმა მამუკა არეშიძემ კვირას „პრესკლუბში” გამართულ პრესკონფერენციაზე განაცხადა.
არეშიძე აცხადებს, რომ აღნიშნულ პირებს დაკვეთის შესრულების სანაცვლოდ 1000-1500 ლარის ოდენობით ხელფასს სთავაზობენ. მისი ინფორმაციით, ადამიანები, რომლებიც რაიონულ ორგანიზაციებში დაიბარეს, სპორტსმენები არიან.
მისივე თქმით, დესტაბილიზაციის მოწყობის გეგმაში არასამთავრობო ორგანიზაციის ის წევრებიც არიან ჩართული, რომლებიც კიევში მუშაობენ.
“2012 წლის არცევნების დროს არეულობის მოწყობა ვერ შეძლეს, რადგან ეს ჯგუფები დაშალეს. მაისის თვიდან ისევ დაიწყეს „ზონდერების“ მობილიზება. მე ორ კონკრეტულ პიროვნებაზე მაქვს ინფორმაცია – ერთია მოჭიდავე, მეორე ბოდიბილდერი. ისინი დაიბარეს „ნაციონალური მოძრაობის“ ოფისებში.
ამ საქმეში ქართველებით დაკომპლექტებული არასამთავრობო ორგანიზაციებიც არიან ჩართულები, რომლებიც კიევში ფუნქციონირებენ და ეს არაა მხოლოდ 2 ადამიანი. მე უბრალოდ ამის თაობაზე მაქვს ინფორმაცია“, – განაცხადა მამუკა არეშიძემ.
ექსპერტი თვლის, რომ ბოლო პერიოდში თბილისის ქუჩებში განვითარებული მოვლენებიც სწორედ აღნიშნული გეგმის შემადგენელი ნაწილია.
“მე ვფიქრობ, რომ რაც დღეს თბილისის ქუჩებში ხდება, ერთგვარი „პრელუდიაა“ იმ ამბებისა, რაც უნდა მოხდეს. ეს უკვე გარკვეულ ეჭვს ბადებს, რომ საზოგადოებისთვის სასიამოვნო არ იგეგმება. მე ეს შემთხვევები ხელოვნურობის განწყობას მიჩენს“, – განაცხადა არეშიძემ.
არეშიძე მიიჩნევს, რომ ამ ვითარების პრევენციის სხვადსხვა ფორმა არსებობს. ექსპერტი ვარაუდობს, რომ ხელისუფლებაც ინფორმირებულია მოსალოდნელ დესტაბილიზაციაზე. მისი თქმით, არეულობის თავიდან ასაცილებლად გამოძიების გარდა, არსებობს სხვა ფორმებიც.
“ზოგჯერ გამოძიება არ არის ეფექტური, ყოველთვის შედეგს არ იძლევა. რამდენიმე შემთხვევაში გამოძიებაც მიმდინარეობს, ხშირად სხვა ფორმითაც ხდება პრევენცია. იმ ორმა პირმა, სპორტსმენებს ვგულისხმობ, ქვეყანა დატოვა. ვვარაუდობ, რომ სწორედ ასეთი პრევენციის შედეგია მათი წასვლა“, – განაცხადა მამუკა არეშიძემ „კვირას“ პრესკლუბში.