კახა კალაძემ ლანჩხუთსა და ჩოხატაურში მაჟორიტარი დეპუტატობის ახალი კანდიდატი წარადგინა

“ქართული ოცნება – დემოკრატიულმა საქართველომ“ ლანჩხუთსა და ჩოხატაურში მაჟორიტარი დეპუტატობის კანდიდატი შეცვალა.
აღნიშნულ ოლქში მაჟორიტარი დეპუტატობის კანდიდატს თემურ ჭკუასელს ნინო წილოსანი ჩაანაცვლებს. ახალი მაჟორიტარი დეპუტატობის კანდიდატი „ქართული ოცნება – დემოკრატიული საქართველოს“ გენერალურმა მდივანმა კახა კალაძემ წარადგინა.
როგორც კალაძემ აღნიშნა, ნინო წილოსანი ლანჩხუთელია და მას კარგად იცნობს აღნიშნული რაიონის მოსახლეობა. „ნინო ძალიან წარმატებული ადამიანია. ის საერთაშორისო ეკონომიკური ურთიერთობების მაგისტრი გახლავთ. გავლილი აქვს პოლიტიკის კურსი ოქსფორდის უნივერსიტეტში. მას აქვს ბიზნესსექტორში საქმიანობის დიდი გამოცდილება. წლების განმავლობაში იყო ელექტროვაგონმშენებელი ქარხნის საფინანსო-ეკონომიკური განყოფილების უფროსი. დღეს კი ამ კომპანიის სამეთვალყურეო საბჭოს თავმჯდომარეა. ნინოს, მისი ახალგაზრდა ასაკის მიუხედავად, ასევე სერიოზული გამოცდილება აქვს საერთაშორისო ეკონომიკური ურთიერთობების მიმართულებით. იმასთან ერთად, რომ ძალიან ახალგაზრდა და წარმატებულია, გახლავთ სამი შვილის დედა და დარწმუნებული ვარ, ის ძალიან წარმატებული მაჟორიტარი დეპუტატი იქნებ“, – განაცხადა კახა კალაძემ.
რაც შეეხება თემურ ჭკუასელს, როგორც „ქართული ოცნება – დემოკრატიული საქართველოს“ გენერალურმა მდივანმა აღნიშნა, ის „ქართული ოცნების“ გუნდში რჩება.
„თემურ ჭკუასელი ჩვენი გუნდის წევრად რჩება და იქნება საპარლამენტო სიის წარმომადგენელი და ჩვენთან ერთად გააგრძელებს ბრძოლას გამარჯვებისთვის“, – განაცხადა კახა კალაძემ და ნინო წილოსანს საპარლამენტო არჩევნებში წარმატებები უსურვა.