საქართველოს პრეზიდენტის განცხადებით, სტაბილური და დაცული საქართველო მნიშვნელოვანია როგორც ქართველებისთვის, ისე რეგიონისთვის და გლობალურადაც.
როგორც გიორგი მარგველაშვილმა ჩრდილოატლანტიკურ საბჭოსთან შეხვედრაზე სიტყვით გამოსვლისას აღნიშნა, საქართველოში ნატოს დელეგაციის ვიზიტი თვალნათლივ აჩვენებს საქართველოს მხარდაჭერას ევროატლანტიკური არჩევანის მიმართ.
”უპირველესად, მადლობას ვუხდი ჩრდილოატლანტიკურ საბჭოს ჩამობრძანებისთვის. საბჭოსთვის ეს უკვე მეოთხე ვიზიტია საქართველოში, რაც თვალნათლივ აჩვენებს თქვენს მტკიცე მხარდაჭერას საქართველოს ევროატლანტიკური არჩევანის მიმართ. მე მჯერა, რომ თანამშრომლობა ღრმავდება და ამ გზაზე ბოლო წერტილი საქართველოს ალიანსში გაერთიანება იქნება. ჩვენ გვაქვს ყველა ინსტრუმენტი იმისთვის, რომ გავაღრმაოთ სვლა ამ მიმართულებით და დაველოდოთ იმ შესაძლებლობების ფანჯარას, რომელიც საბოლოო მიზნამდე მიგვიყვანს. მე მინდა ხაზი გავუსვა, რომ უმნიშვნელოვანესია ის თანამშრომლობა, რომელიც მიმართულია საქართველოს თავდაცვისუნარიანობის გაძლიერებისკენ, სტაბილური და დაცული საქართველო მნიშვნელოვანია, როგორც ქართველებისთვის, ისე რეგიონისთვის და მნიშვნელოვანია გლობალურადაც, რეგიონული თანამშრომლობისთვის”, – განაცხადა გიორგი მარგველაშვილმა.
პრეზიდენტის თქმით, კასპიისა და შავი რეგიონებს შორის პოლიტიკური, ეკონომიკური, სავაჭრო და კულტურული კავშირების განმტკიცება მისცემს შესაძლებლობებს არა მხოლოდ საქართველოს, არამედ ათეულობით ქვეყანას, დასავლეთით და აღმოსავლეთით.
”ყოველთვის ხაზს ვუსვამდით შავი ზღვის მნიშვნელობას მის აღმოსავლეთ ნაწილში და საერთაშორისო უსაფრთხოების მექანიზმების გაღრმავებას. ვარშავის კომუნიკეში სწორედ ეს მომენტი იქნა ხაზგასმული და მე მიხარია, რომ საქართველო აქტიური მონაწილე იქნება შავი ზღვის უსაფრთხოების, როგორც რეგიონული თანამშრომლობის უმნიშვნელოვანესი კომპონენტის თაობაზე მსჯელობებსა და დისკუსიებში. ეს თანამშრომლობა განსაკუთრებულ მნიშვნელობას იძენს თანამედროვე მსოფლიოში. დღეს საგრძნობლად იზრდება არაკონვენციური ომის საფრთხეები და საქართველო ამ საფრთხეებს, თავისი გმირი ჯარისკაცების მონაწილეობით საერთაშორისო მისიებში, პასუხისმგებლობით პასუხობს”, – აღნიშნა პრეზიდენტმა.