დღეს, სასტუმრო „ვინოტელში“ კონფერენცია – „მეტი მეგობარი საქართველოს“ გაიმართა, რომელსაც ამერიკული რესპუბლიკური კლუბ „ქვინსის“ ვიცე-პრეზიდენტი ჯოზეფ კონქენანი, ამერიკაში არსებული არასამთავრობო ორგანიზაციის „თვისტომის“ დამფუძნებელი და კლუბ „ქვინსის“ ბიზნესბორდის დირექტორატის წევრი ნიკოლოზ ჩხეიძე, სამგორის რაიონის დამოუკიდებელი მაჟორიტარობის კანდიდატი, კლუბ „ქვინსის“ საპატიო წევრი ირაკლი შიხიაშვლი და არასამთავრობო ორგანიზაციების წარმომადგენლები ესწრებოდნენ.
ღონისძიებაზე მხარეებმა ქართულ-ამერკულ ტრადიციებსა და ღირებულებებზე ისაუბრეს. ასევე, დეტალურად განიხილეს ამერიკული „რესპუბლიკური“ პარტიის ღირებულებები. როგორც „ქვინსის“ ვიცე-პრეზიდენტმა ჯოზეფ კონქენანმა აღნიშნა, ამერიკული „რესპუბლიკური“ პარტია ტრადიციებს ეფუძნება.
„პირველ რიგში, გავმიჯნოთ „რესპუბლიკური“ პარტია. პარტია ეფუძნება ტრადიციებსა და ოჯახს. ამერკაში არის ბევრი ისეთი უბანი, სადაც ტრადიციები ისევ არსებობს. სწორედ ამისთვის ვარ საქართველოში, რომ ორი ქვეყნის ტრადიციები გავამყაროთ.
ოჯახურ ტრადიციებზე საუბარი მნიშვნელოვანია. ეს არის ინფორმაციის გადმოცემა ჩვენი წინაპრებიდან ჩვენამდე. ეს არის ძალა, რომელიც გადადის თაობიდან თაობამდე. ყველაფერი ოჯახიდან იწყება. ეს სწორედ ის პრიციპებია, რაც საფუძვლად ჩვენი ქვეყნების ალიანსს“, – განაცხადა ჯოზეფ კონქენანმა.
ღონისძიებაზე ხაზგასმით აღინიშნა იმ არასამთავრობო ორგანიზაციის ფუნქცია, რომელიც ჯოზეფ კონქენანის, ნიკოლოზ ჩხეიძისა და ირაკლი შიხიაშვილის ინიციატივით დაარსდება საქართველოში. მისი სახელწოდება იქნება „ქართულ-ამერიკული რესპუბლიკური ალიანსი“ და ხელს შეუწყობს ორი ქვეყნის საზოგადოების ურთიერთობის გაღრმავებასა და ინფორმაციის გაცვლას. როგორც ნიკოლოზ ჩხეიძემ აღნიშნა, ორგანიზაცია ჩამოყალიბდება რესპუბლიკური კლუბის ბაზაზე.
„არასამთავრობო ორგანიზაცია ჩამოყალიბდება რესპუბლიკური კლუბის ბაზაზე და იგივე ტიპის მიმართულების იქნება. ამ პროცესებში თქვენი ჩართულობა მნიშვნელოვანია“, – განაცხადა „თვისტომის“ დამფუძნებელმა. ღონისძიების დასასრულ, ჯოზეფ კონქენანმა ირაკლი შიხიაშვილს ნიუ-იორკის პოლიციის დეპარტამენტის საქველმოქმედო ასოციაციის წევრის წოდება მიანიჭა.