ზურაბ ტყემალაძე დღეს ცენტრალური საარჩევნო კომისიის თავმჯდომარეს თამარ ჟვანიას შეხვდა.
ზურაბ ტყემალაძის თქმით, პარტია „თოფაძე მრეწველები, ჩვენი სამშობლოს“ რეგისტრაციიდან მოხსნით ვიღაც არის დაინტერესებული.
„ისეთი ინფორმაცია მოვისმინე, ვინ ურეკავს და რატომ კითხულობენ ჩვენი პარტიის შესახებ მოხსნა-არმოხსნას, ჯერ გამცენ პასუხი და ყველაფერს ფარდა აეხდება“, – განაცხადა ტყემალაძემ.
ტყემალაძის თქმით, კომპიუტერული ხარვეზი იყო სიის ამბეჭდვის დროს.
„კომპიუტერული ხარვეზი იყო სიის ამობეჭდვის დროს, რომელიც უნდა შეგვეცვალა და შევცვალეთ კიდეც. თავის დროზე მოვიტანეთ და ჩავაბარეთ. ჩაბარების პროცესი გუშინ 17.24 საათზე დაიწყო და 18.12 საათზე დასრულდა, რასაც თვლიან ხარვეზად. ჩვენ გვაქვს დოკუმენტი, რომელიც ადასტურებს, რომ აბსოლუტურად ყველაფერი ჩავაბარეთ. დღეს განცხადება ჩავაბარე, რომ თამარ ჟვანიამ მოკვლევა ჩაატაროს და გაგვცეს პასუხი. ეს არის თავმჯდომარის პრეროგატივა“, – განაცხადა ზურაბ ტყემალაძემ.
მისივე თქმით, თუ პასუხი უარყოფითი იქნება, პარტიის წევრები სასამართლოს მიმართავენ.
„თუ პასუხი უარყოფითი იქნება, ჩვენ წავალთ სასამართლოში. არ მინდა, რომ დღევანდელი საარჩევნო კომისია დაემსგავსოს 2000-იანი წლების კომისიას“, – განაცხადა ტყემალაძემ.
შეხვედრაზე ასევე იმყოფებოდა პარტიის ერთ-ერთი ლიდერი ზვიად ჩიტიშვილიც.
ზვიად ჩიტიშვილმა საზოგადოებას მხარდაჭერისკენ მოუწოდა.
„ეს არის ბრძოლა ქართველებს, ამერიკელებსა და თურქებს შორის. იმათ აზრს უფრო უსმენენ აქ, ვიდრე ქართველებისას, ეს ადამიანექბი ხელს გვიშლიან აფხაზებთან, ოსებთან და რუსებთან შერიგებაში“, – განაცხადა ზვიად ჩიტიშვილმა.
მისივე თქმით, ხვალიდან დიდ აქციებს დაიწყებენ.