მსგავსი რამ ბატონი ზურასთვის ნამდვილად არ მითქვამს, რომ NDI-მ ან IRI-მ საერთოდ დამირეკა ”თოფაძე-მრეწველების” საკითხთან დაკავშირებით, – ამის შესახებ ცესკოს თავმჯდომარემ, თამარ ჟვანიამ ტელეკომპანია ”იმედის” ეთერში განაცხადა.
მისივე თქმით, ყველა რეგისტრირებული პარტია თუ ბლოკი ვადების შესახებ ინფორმირებული იყო.
”როგორ შეიძლება, რომ ისეთი გამოცდილი პარტია, როგორიც არის ”მრეწველობა გადაარჩენს საქართველოს”, არ ყოფილიყო ინფორმირებული? ეს ყოველთვის ასე იყო. ეს არ არის პირველი არჩევნები, რომ ვადებთან დაკავშირებით რაიმე შეცვლილიყო. ყველა რეგისტრირებულ პარტიას, ყველა რეგისტრირებულ ბლოკს, ჰქონდა ინფორმაცია საბუთების, დოკუმენტაციის და პარტიული სიის წარმოდგენის შესახებ. ძალიან მიჭირს იმაზე საუბარი, რაში იყო პრობლემა და რაში იყო შეცდომა, ეს პარტიის შიგნით უკეთესაც ეცოდინებათ”, – განაცხადა ჟვანიამ.
რაც შეეხება ”მრეწველების” ერთ-ერთი ლიდერის, ზურაბ ტყემალაძის განცხადებას, რომ ჟვანიამ აღნიშნული გადაწყვეტილება მას შემდეგ მიიღო, რაც NDI და IRI დაუკავშირდნენ და ამის შესახებ ცესკოს თავმჯდომარემ თავად უთხრა, ჟვანიას თქმით, ეს სიცრუეა.
”მსგავსი რამ ბატონი ზურასთვის ნამდვილად არ მითქვამს, რომ NDI-მ ან IRI-მ საერთოდ დამირეკა ”თოფაძე-მრეწველების” საკითხთან დაკავშირებით. ამაზე მეღიმება კიდეც. ამ ორგანიზაციებს არ დაურეკავთ და არ დაინტერესებულან ამ კონკრეტული საკითხით. ზოგადად, დამკვირვებლები ყველა საკითხით ინტერესდებიან, მაგრამ ასეთი რამ არ მომხდარა. ბატონი ზურა საუბრობდა, რომ მე ამერიკის ელჩმაც დამირეკა და ამაზეც მეღიმება. შესაძლოა ბატონმა ზურამ ხვალ ისიც თქვას, რომ ობამამ დამირეკა”, – აღნიშნა ჟვანიამ.