შს მინისტრმა გიორგი მღებრიშვილმა ინტერპოლის გენერალური სამდივნოს პროექტ „მილენიუმის“ კონფერენცია გახსნა.
შს მინისტრმა კონფერენციაზე მოწვეულ 24 ქვეყნის 58 დელეგატს სიტყვით მიმართა და უწყების მიერ საერთაშორისო საპოლიციო თანამშრომლობის კუთხით მიღწეული შედეგები და განხორციელებული პროექტები გააცნო.
„ჩვენს ქვეყანას ამ პროექტის არსებობაში დიდი წვლილი მიუძღვის, გამომდინარე იქიდან, რომ საქართველოს სამართალდამცავ ორგანოებს ორგანიზებულ დანაშაულთან ბრძოლის კუთხით დიდი გამოცდილება გააჩნიათ. დღევანდელი სამუშაო ჯგუფის შეკრების მიზანია როგორც ტრანსნაციონალურ, ევრაზიულ, ორგანიზებულ დანაშაულებრივ ჯგუფებთან ბრძოლის კუთხით გამოცდილების გაზიარება, აგრეთვე ინსტიტუციონალური და ამასთან, უფრო მჭიდრო ურთიერთობების ჩამოყალიბება“, – განაცხადა გიორგი მღებრიშვილმა.
მისივე თქმით, 2015 წელს, პრაღაში ჩატარებული სამუშაო ჯგუფის ბოლო შეხვედრის ფარგლებში ინტერპოლის გენერალურმა სამდივნომ გამოიჩინა ინიციატივა, რომ პროექტის წევრი ქვეყნებიდან სამი წამყვანი წევრი შერჩეულიყო. საქართველომ გამოთქვა სურვილი მონაწილეობა მიეღო ახალ ინიციატივაში და საფრანგეთთან და გერმანიასთან ერთად პროექტ „მილენიუმის“ წამყვანი წევრი ქვეყანა გახდა.
თბილისში გამართულ ორდღიან კონფერენციაში ინტერპოლის გენერალური სამდივნოს, ევროპოლის და პროექტ „მილენიუმის“ 24 წევრის (აშშ, დიდი ბრიტანეთი, ფინეთი, ლატვია, გერმანია, შვეიცარია, საქართველო, ბელარუსი, აზერბაიჯანი, შვედეთი, ესტონეთი, ესპანეთი, რუსეთი, ჩეხეთი, ისრაელი, საბერძნეთი, ავსტრია, საფრანგეთი, იტალია, იაპონია, კანადა, მოლდოვა, ბელგია, უკრაინა, არაბთან გაერთიანებული საემიროები) 58 დელეგატი, ასევე საფრანგეთის, ავსტრიის, ისრაელის და საბერძნეთის პოლიციის ატაშეები მონაწილეობენ. კონფერენციის ფარგლებში ასევე გაიმართება სამუშაო ჯგუფის შეხვედრები, სადაც დელეგატები საქართველოს სამართალდამცავი ორგანოების მიერ ე.წ. კანონიერი ქურდებისა და ორგანიზებული დანაშაულის წინააღმდეგ ბრძოლაში მიღწეულ წარმატებებს გაეცნობიან.