„ქართული ოცნება – დემოკრატიული საქართველოს“ მაჟორიტარი დეპუტატობის კანდიდატებმა ამომრჩევლებთან შეხვედრები გამართეს.
პარტიის პრესსამსახურიდან აცნობეს, ფოთის მაჟორიტარობის კანდიდატმა „ქართული ოცნებიდან“ ირაკლი ხახუბიამ ამომრჩეველს ფოთში დაგეგმილი პროექტები გააცნო.
ნაბადის უბანში კანდიდატთან შესახვედრად მისული მოსახლეობა ქალაქის განვითარების კონკრეტული პროგრამებით დაინტერესდა. როგორც ხახუბაიმ აღნიშნა, ყოფილმა ხელისუფლებამ ქალაქის საავადმყოფო გაასხვისა, რაც ფოთში ჯანდაცვის სეგმენტში სერიზოული პრობლემების მიზეზი გახდა, თუმცა ამ მიმართულებით უკვე შემუშავებულია „ემერჯენსის“ განვითარების პროექტი, რაც მრავალ პრობლემას მოაგვარებს ფოთელებისათვის. კიდევ ერთი შეხვედრა ამომრჩევლებთან კუნძულის უბანში შედგა.
ირაკლი ხახუბიამ ჯანდაცვის საყოველთაო პროგრამის მიმდინარე და ახალი დეტალებზე გაამახვილა ყურადღება. ხახუბიამ განმარტა, რომ ფოთში მცირე და საშუალო ბიზნესის განვითარების სპეციალური გეგმა მუშაობს, მათ შორის ერთ-ერთი ყველაზე პრიორიტეტულია სანაპირო ზოლის განაშენიანება, რაც ქალაქში ტურიზმის სეგმენტს განავითარებს. ირაკლი ხახუბია ამომრჩევლებს მალთაყვის უბანშიც შეხვდა. საუბარი მამართველი გუნდის მიერ ზოგადად ქვეყანაში და კონკრეტულად ფოთში განხორციელებულ რეფორმებს შეეხო. როგორც ირაკლი ხახუბიამ აღნიშნა, ფოთში ტურიზმის განვითარება ერთ-ერთი პრიორიტეტული მიმართულებაა, ახალი ბულვარის მშენებლობა ქალაქის მოსახლეობისათვის ბიზნესის განვითარებისა და ახალი სამუშაო ადგილების შექმნის შესაძლებლობას იძლევა. ბიზნესის განვითარების კიდევ ერთი ხელშემწყობი ფაქტორი, რომელზეც ირაკლი ხახუბიამ გაამახვილა ყურადღება, ინფრასტრუქტურული პროექტებია – ქალაქის შიდა გზებისა და საკანალიზაციო სისტემების სარეაბილიტაციო სამუშაოები.
„ქართული ოცნების“ კიდევ ერთი მაჟორიტარი დეპუტატობის კანდიდატი ენზელ მკოიანი ამჯერად ახალქალაქის მუნიციპალიტეტის სოფლებში – კარწახი, დადეში, სულდა და ბოზალი – იმყოფებოდა. მან,,ქართული ოცნების“ საარჩევნო პროგრამაზე, ოთხი წლის განმავლობაში განხორციელებულ პროექტებზე – უფასო სასკოლო სახელმძღვანელოები, უფასო საბავშვო ბაღები, საყოველთაო ჯანდაცვა, თავისუფალი ბიზნესი – ისაუბრა. საუბარი შეეხო მთის კანონსაც, რომლითაც გათვალისწინებული შეღავათები ახალქალაქისა და ნინოწმინდის მუნიციპალიტეტებზე სრულად ვრცელდება. კანდიდატმა მოსახლეობისგან პრობლემებიც მოისმინა, რაც ძირითადად სოციალურ და ყოფით საკითხებს შეეხებოდა – გზა, სარწყავი წყალი, გარეგანათება, გაზიფიცირება.
,,ყველანაირად ვეცდებით, რომ ორ-სამ წელიწადში თქვენ გქონდეთ საბავშვო ბაღი, გზები, მოხდეს სოფლების გაზიფიცირება. მინდა, გჯეროდეთ, ჩემი უმნიშვნელო დაპირება გაცილებით რეალური იქნება, ვიდრე სხვისი გულუხვი შემოთავაზება. მე ვიცნობ თქვენს პრობლემებს, ყველანაირად ვეცდები, რომ ეტაპობრივად მოვაგვაროთ“, – მიმართა ენზელ მკოიანმა ამომრჩევლებს.