მიხეილ სააკაშვილმა დაასრულა კრახით, ბიძინა ივანიშვილმა კი მიუხედავად ამდენი გამოწვევისა, რაც რეგიონშია, რაც ჩვენი ქვეყნის წინაშე იყო, უზრუნველყო გუნდთან ერთად პროგრესის მიღწევა და ამ პროგრესის გარკვეულ ეტაპზე, ისევ იმისთვის რომ ქვეყანაში კიდევ უფრო მეტი დინამიზმი შეიძინოს პოლიტიკურმა პროცესმა, დატოვა პოლიტიკა, – ასე უპასუხა პარლამენტის თავმჯდომარემ, არჩილ თალაკვაძემ ჟურნალისტების კითხვას იმის შესახებ თუ რა განსხვავებაა მიხეილ სააკაშვილის და ბიძინა ივანიშვილის პოლიტიკიდან წასვლას შორის.
„ძირითადი არსებითი განსხვავება ის იყო, რომ სააკაშვილი საზოგადოებამ გაიყვანა, მოდით ასე ვთქვათ, საზოგადოებამ გააგდო პოლიტიკიდან, იმიტომ რომ ის ახორციელებდა ხელისუფლების უზურპაციას, აყალბებდა არჩევნებს, აკონტროლებდა მედიას და ბიზნესი ჰყავდა ტერორის ქვეშ მოქცეული. რაც შეეხება ბიძინა ივანიშვილს, მან საკონსტიტუციო რეფორმით, ინსტიტუციური რეფორმებით ხელისუფლება დაუბრუნა საზოგადოებას, არჩევნები დაუბრუნა საზოგადოებას, საკუთარი მიზნები ღიად ჰქონდა გაცხადებული და დღეს ასევე ღიად განაცხადა თუ რატომ გადაწყვიტა, რომ გავიდეს პოლიტიკიდან და მართვის სათავეები და ის პასუხისმგებლობა, რომელიც ჰქონდა, როგორც „ქართული ოცნების“ თავმჯდომარეს, გადააბაროს გუნდს. აი ეს არის განსხვავება, როგორ იქცევიან არადემოკრატი ადამიანები და როგორ იქცევა დემოკრატი ლიდერი“, – განაცხადა თალაკვაძემ.