ბიძინა ივანიშვილის მხრიდან გადადგმული ეს ნაბიჯი კარგად აქვს გააზრებული. მან კარგად იცის რას წარმოადგენს მისი გუნდი, ლიდერები და ის შემადგენლობა, რომელიც დღეს მართავს ქვეყანას, – ამის შესახებ, ტელეკომპანია „იმედის“ გადაცემა „ღია ეთერში“ „ქართული ოცნების“ გენერალურმა მდივანმა, კახა კალაძემ განაცხადა.
„როდესაც 2011-2012 წლებში პარტია „ქართული ოცნება“ ყალიბდებოდა და ვიწყებდით ბრძოლას, ყველაზე მთავარი და მნიშვნელოვანი იყო ის, რომ გაკეთებულიყო სწორი პოლიტიკური ანალიზი და არ გვემოქმედა პოლიტიკური ანგარიშსწორებით. კიდევ ერთხელ მინდა გავიხსენო ბიძინა ივანიშვილის სიტყვები, როდესაც ჩვენ მოვიგეთ არჩევნები და ბევრი ბრძოლა გამოვიარეთ, მან ერთ-ერთ ინტერვიუში განაცხადა, რომ ჩვენ მოვიქცევით ისე როგორც სჭირდება და ეკადრება ჩვენს ქვეყანას და არა როგორც იმსახურებს ოპოზიცია. ბევრმა ეს არასწორად გაიგო და რადგან სამართლიანი მოთხოვნა იყო, რომ ძალიან ბევრ ადამინს პასუხი უნდა ეგო ჩადენილი დანაშაულისთვის. რაღაცეებზე მაღლა დადგა ბიძინა ივანიშვილი და გუნდი „ქართული ოცნება“, – განაცხადა კალაძემ.
მისი თქმით, ბიძინა ივანიშვილის ამ პოზიციას, გარკვეულწილად ისიც არ დაეთანხმა, თუმცა ამ გადმოსახედიდან მიიჩნევს, რომ „ქართული ოცნების“ ლიდერი მართალი იყო. „ბევრჯერ ვთქვი, ინტერვიუებში, რომ ასეთი ურთიერთობები არ იყო სწორი. თუმცა ამ გადმოსახედიდან, რაც უფრო დრო გადის ეს გადაწყვეტილება სწორია და მნიშვნელოვანი. ჩვენი ქვეყნის მოსახლეობა, საზოგადოება, რაც უფრო დრო გავა კიდევ უფრო კარგად შეაფასებს ბიძინა ივანიშვილის როლს ქართულ პოლიტიკაში. მერწმუნეთ, რომ ნამდვილად არაა მარტივი დემოკრატიული ქვეყნის მშენებლობა. ეს რომ მარტივი ყოფილიყო, ამას სააკაშვილი მარტივად გააკეთებდა და დიქტატორად არ ჩამოყალიბდებოდა. მეამაყება ჩემს თანაგუნდელებთან ერთად, პატარა აგური დავდე ბიძინა ივანიშვილთან ერთად სახელმწიფო ინსტიტუტების გაძლიერებისთვის. მივიღე მონაწილეობა სიტყვის და გამოხატვის თავისუფლების მაღალ სტანდარტზე აყვანაში, რა თქმა უნდა ეს პროცესი უნდა გაგრძელდეს მომდევნო წლების განმავლობაში“, – განაცხადა კალაძემ.