გაეროში აშშ-ის ყოფილმა ელჩმა, ნიკი ჰეილიმ განაცხადა, რომ პრეზიდენტის რანგში ჯო ბაიდენის პირველი კვირა რუსეთისთვის კარგი აღმოჩნდა.
„შემიძლია გითხრათ, რომ რუსეთის პრეზიდენტი ვლადიმერ პუტინი ახლა ძალიან აღტაცებული უნდა იყოს“, – აღნიშნა ნიკი ჰეილიმ.
ნიკი ჰეილიმ მითითება გააკეთა ენერგეტიკის სფეროში ჯო ბაიდენის ქმედებებზე, რომელიც Keystone XL-ის ნავთობსადენის პროექტის შეჩერებას მოიცავს. გარდა ამისა, ჯო ბაიდენის ადმინისტრაციამ ფედერალურ მიწებსა და წყლებში ნავთობისა და გაზის მოპოვების ნებართვის გაცემა დროებით შეაჩერა.
„ერთი რამ, რაც პუტინს ყველაზე მეტად აწუხებდა, იყო ის, თუ რამდენად დამოუკიდებელნი გავხდით ენერგეტიკის სფეროში“, – განაცხადა გაეროში აშშ-ის ყოფილმა ელჩმა.
ნიკი ჰეილიმ ასევე აღნიშნა, რომ ჯო ბაიდენმა რუსეთს ბირთვული იარაღის კონტროლის შესახებ ხელშეკრულების ხუთი წლით გახანგრძლივება შესთავაზა, რაც მისი აზრით, „რუსეთს დიდ უპირატესობას აძლევს“.