საბერძნეთი და ავსტრია ევროკავშირის ქვეყნებს კოვიდპასპორტების დამტკიცებისკენ მოუწოდებენ, რაც მათივე განცხადებით, ტურისტული ინდუსტრიის გამოცოცხლებას შეუწყოს ხელს. ამის შესახებ BBC წერს.
ასეთ დოკუმენტს სავარაუდოდ ის ადამიანები მიიღებენ, რომელთაც კორონავირუსის საწინააღმდეგო ვაქცინაცია ექნებათ გაკეთებული და ისინი ევროკავშირში მოგზაურობას თავისუფლად შეძლებენ.
საფრანგეთი და გერმანია მიიჩნევენ, რომ ასეთი დოკუმენტები შეიძლება ნაადრევი იყოს, რადგან ვაქცინების ეფექტურობის შესახებ მონაცემები არასრულია.
გერმანიის კანცლერმა, ანგელა მერკელმა განაცხადა, რომ ვაქცინაციის ციფრული სერთიფიკატები, სავარაუდოდ, ზაფხულამდე ხელმისაწვდომი გახდება.
ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.