ჰუმანიტარული დახმარების გარდა, აშშ რუსეთისთვის დახმარების გაწევას წყვეტს. ამის შესახებ აშშ-ის სახელმწიფო დეპარტამენტის განცხადებაშია ნათქვამი.
ალექსეი ნავალნის საქმეზე დაწესებული სანქციების ფარგლებში, აშშ-მა რუსეთი იმ ქვეყნების სიიდან ამოიღო, სადაც შეიარაღების გაყიდვა ან ექსპორტია შესაძლებელი.
გარდა ამისა, აშშ რუსეთის მონაწილეობით სამხედრო დაფინანსების ნებისმიერ პროგრამას წყვეტს.
აშშ-ის სახელმწიფო დეპარტამენტში ასევე აღნიშნეს, რომ აშშ უარს ამბობს რუსეთისთვის კრედიტების, საკრედიტო გარანტიების ან სხვა სახის ფინანსური დახმარების გაცემაზე.
ალექსეი ნავალნის მოწამვლისა და დაპატიმრების საქმეზე ჯო ბაიდენის ადმინისტრაციამ რუს მაღალჩინოსნებს პერსონალური სანქციები დაუწესა.
აშშ-ის სახაზინო დეპარტამენტმა იმ რუსი მაღალჩინოსნების სია გამოაქვეყნა, რომლებსაც ალექსეი ნავალნის საქმეზე სანქციები დაუწესდა.
კერძოდ, ჯო ბაიდენის ადმინისტრაციამ სასანქციო სიაში შემდეგი მაღალჩინოსნები შეიყვანა: უსაფრთხოების ფედერალური სამსახურის დირექტორი ალექსანდრე ბორტნიკოვი, სასჯელაღსრულების ფედერალური სამსახურის ხელმძღვანელი ალექსანდრე კალაშნიკოვი, გენერალური პროკურორი იგორ კრასნოვი, თავდაცვის მინისტრის მოადგილეები ალექსეი კრივორუჩკო და პაველ პოპოვი, კრემლის შიდა პოლიტიკის სამმართველოს ხელმძღვანელი ანდრეი იარინი.
გარდა ამისა, აშშ-მა სანქციები შემდეგ ორგანიზაციებს დაუწესა: რუსეთის თავდაცვის სამინისტროს 27-ე სამეცნიერო ცენტრი, რუსეთის თავდაცვის სამინისტროს 33-ე კვლევითი ცენტრი და ორგანული ქიმიისა და ტექნოლოგიების კვლევითი ცენტრი.