გამიხარდებოდა, რომ პირველ ტურში დასრულებულიყო, მაგრამ ჩვენ ვართ მზად იმისთვის, რომ მეორე ტურში გავიმარჯვოთ, – ამის შესახებ ”ქართული ოცნების” მაჟორიტარი დეპუტატობის კანდიდატმა საბურთალოში ლევან გოგიჩაიშვილმა PalitraNews-ის გადაცემა ”360 გრადუსში” განაცხადა.
როგორც ლევან გოგიჩაიშვილმა აღნიშნა, პირადად მის ოლქში იყო ძალიან დიდი კონკურენცია.
”10-ზე მეტი მაჟორიტარი იყო წარმოდგენილი ჩემს ოლქში. საერთო ჯამში რაც მათ ერთად აიღეს, იგივე ავიღე მე. ამ შემთხვევაში ყოველმა მეორე საბურთალოელმა, ვინც არჩევნებზე მოვიდა, ხმა მომცა, მე და ”ქართულ ოცნებას”. ნდობა ჩვენს მიმართ არის ძალიან მაღალი და ჩვენ ვაპირებთ, რომ ნდობა გავამართლოთ.
მოლოდინი იყო მაღალი, თუმცა 47% -ც არ არის პატარა. გამიხარდებოდა, რომ პირველ ტურში დასრულებულიყო, მაგრამ ჩვენ ვართ მზად იმისთვის, რომ მეორე ტურში გავიმარჯვოთ. ყველანაირი მონაცემებით ჩვენ მეორე ტურს ყველგან მოვიგებთ და პარლამენტში სავარაუდოდ გვეყოლება საკონსტიტუციო უმრავლეოსობა”, – განაცხადა ლევან გოგიჩაიშვილმა.
საბურთალოს მე-6 მაჟორიტარულ ოლქში შედეგები შემდეგნაირად გადანაწილდა: „ქართული ოცნების“ კანდიდატი ლევან გოგიჩაიშვილი 46,89 %, „ნაციონალური მოძრაობის“ კანდიდატი სევდია უგრეხელიძე – 17,2 %, ამომრჩეველთა 11,7 %-მა დაუჭირა მხარი „რესპუბლიკური პარტიის“ ლიდერ დავით უსუფაშვილს.
საქართველოს მასშტაბით არჩევნების მეორე ტური 52 ოლქში გაიმართება. აქედან თბილისის 18 და რეგიონების – 34 ოლქში. ცენტრალურმა საარჩევნო კომისიამ უკვე დათვალა და გამოაქვეყნა მაჟორიტარულ ოლქებში არსებული ყველა საარჩევნო უბნის მონაცემები. არჩევნების მეორე ტური ინიშნება ყველა იმ ოლქში, სადაც კანდიდატმა „საარჩევნო კოდექსით“ განსაზღვრული 50 %-იანი ბარიერის გადალახვა ვერ შეძლო.