დავით უსუფაშვილი – ევერესტზე ასვლა არ არის მთავარი, იქიდან დაუზიანებლად ჩამოსვლაც აუცილებელია

,,ევერესტზე ასვლა არ არის მთავარი, იქიდან დაუზიანებლად ჩამოსვლაც აუცილებელია“, – ამის შესახებ პარლამენტის თავმჯდომარე დავით უსუფაშვილმა ტელეკომპანია „ტვ პირველის“ პირდაპირ ეთერში განაცხადა.
როგორც უსუფაშვილმა აღნიშნა, საკონსტიტუციო უმრავლესობა-ეს არის შეცდომების ყველაზე ადვილად დაშვების შესაძლებლობა.
„აქ ძალიან მარტივადაა საქმე. საკონსტიტუციო უმრავლესობით მართვა კია არაა რთული, შეცდომების დაშვებაა ადვილი. ეს ძალიან ხშირად მომხდარა ჩვენს რეალობაში. კომუნისტური პარტიიდან მოყოლებული, ვისაც ჰქონდა საკონსტიტუციო უმრავლესობა, იყო მრგვალი მაგიდა, იყო მოქალაქეთა კავშირი, იყო ნაციონალური მოძრაობა, აჭარაში იყო კიდევ აღორძინება, ჩვენვე, ჩვენს ცხოვრებაში ვნახეთ, რომ საკონსტიტუციო უმრავლესობა ეს არის შეცდომების ყველაზე ადვილად დაშვების შესაძლებლობა, მაშინ, როდესაც ადამიანებს უვითარდებათ განცდა, რომ მათ ხომ უკვე ყველაფერი იციან, ასე მარტივია ყველაფრის კეთება და ხდება შეცდომების დაშვება.
ეს არის სახიფათო და ამაზე მეტყველებს ჩვენი ისტორია. ვისაც ამისი დრო და საშუალება აქვს და ცოტა უფრო იქით გადაიხედავს, დემოკრატიული სამყარო რა პრინციპებს ეფუძნება, სად და როგორ არის მიღწეული ეფექტური მმართველობა, მაშინ არის მთავრობა უფრო წარმატებული, როდესაც 90%- აკონტროლებს პარლამენტში თუ მაშინ, როდესაც მას საშუალება აქვს კონსულტაციებით და კონსენსუსით ქვეყნის ყველა პოლიტიკურ ძალასთან მჭიდრო ურთიერთობით მიიღოს გადაწყვეტილებები. გადავიხედოთ ევროპაში.
თუ მანახებთ ერთ ქვეყანას, რომელიც იყო წარმატებული გინდ რეფორმების პროცესში, გინდ ზოგადად, განვითარების პროცესში, სადაც ერთი პარტია იყო საკონსტიტუციო უმრავლესობით წარმოდგენილი, მეც შეიძლება აზრი შევიცვალო. ამ თვალსაზრისით, საქართველო არ არის გამონაკლისი. პირიქით, ჩვენი უახლესი ისტორია ამას ადასტურებს. მე კარგად მესმის დღევანდელი აღტყინება,  რასაც ვხედავ ჩემს კოლეგებში თუ “ქართული ოცნების” წარმომადგენლებში, ვინც სიამაყით ამბობს, რომ ჩვენ ეს გვექნება… რომ ამით თითქოს ევერესტზე ავედით. მაგრამ ევერესტზე ასვლა არ არის მთავარი, იქიდან დაუზიანებლად ჩამოსვლაც აუცილებელია “,-განაცხადა უსუფაშვილმა.