კახა შარტავა ახალი ევროპული ტიპის მსხვილი პარტიის ჩამოყალიბების ინიციატივით გამოდის

„ჩვენი აზრით აუცილებელია ამ ვითარებაში რეალური, ნამდვილი, სერიოზული, ევროპული, კლასიკური ტიპის პარტიის ჩამოყალიბება,“ – ამის შესახებ ეროვნული ფორუმის ლიდერმა კახა შარტავამ დღევანდელ პრესკონფერენციაზე განაცხადა, სადაც ახალი ევროპული ტიპის მსხვილი პარტიის ჩამოყალიბების ინიციატივით გამოვიდა.
მისი თქმით, სახელისუფლებო მართვის სისტემამ, რომლის რეკონსტრუქციის აუცილებლობაზეც ეროვნული ფორუმი დიდი ხნის განმავლობაში საუბრობდა, ათასობით, ათი ათასობით ხმა გააყალბა.
„ჩვენი აზრით, აუცილებელია ამ ვითარებაში რეალური, ნამდვილი, სერიოზული, ევროპული, კლასიკური ტიპის პარტიის ჩამოყალიბება და ყველა სხვადასხვა პარტიაში გაფანტული რესურსის მოკრება.
ადამიანური, საკადრო, შეხედულებების და ისეთი პარტიის ჩამოყალიბება, რომელიც თავს მოუყრის ყველა მრავალფეროვნებას და ყველა რესურსს. სხვა შემთხვევაში ასეთივე მდგომარეობას გადავაწყდებით და ამასობაში სახელისუფლებო პარაზიტი სისტემა, რომელიც 24 წლის განმავლობაში ხრავს ქვეყნის სამეურვეო ეკონომიკურ ხერხემალს, მთლიანად გადაიყოლებს ქვეყანას და თვითონაც გადაჰყვება ზედ და აქ უკვე საქართველოს საერთაშორისო ფუნქციაზეც ვერ იქნება საუბარი. ასეთი ტიპის სერიოზული პარტიის ჩამოყალიბებისთვის ჩვენ მზად ვართ ვიყოთ პარტიული მსხვერპლი ასეთი პროცესისა და შევეწიროთ ამ მნიშვნელოვანი პროცესის დაწყებას,“ – განაცხადა კახა შარტავამ.
მომხდარში შარტავა ამომრჩეველსაც ადანაშაულებს და ამბობს, რომ ხელისუფლებას გაყალბების საშუალება ამომრჩეველმაც მისცა. გარდა ამისა, მისივე განცხადებით, “ვერ ივარგეს” არჩევნებში მონაწილე პარტიებმა, რადგან ეროვნული ფორუმის ლიდერის განცხადებით, წინასაარჩევნო პერიოდში მათ ამომრჩეველს ვერ დაანახეს პარლამენტის მრავალპარტიულობის აუცილებლობა და ვერ შესთავაზეს ალტერნატივა.