კენეტ იალოვიცი: გიორგი კვირიკაშვილის მთავრობის დამსახურებაა ხელისუფლების დამაჯერებელი გამარჯვება

The Heritage Foundation- ში ამერიკელი ექსპერტების შეხვედრისას საქართველოში აშშ-ის ყოფილმა ელჩმა კენეტ იალოვიცმა გაიხსენა საკუთარი გამოცდილება 1998-2001 წლების საქართველოში და გაიხსენა ის, თუ როგორ მიმდინარეობდა 1999 წლის საპარლამენტო და 2000 წლის საპრეზიდენტო არჩევნები, და აღნიშნა თუ რა დიდ პროგრესს მიაღწია ქვეყანამ გასული 16-17 წლის განმავლობაში. ამისთვის მთელი ქართველი ერი მოლოცვას იმსახურებს.
დიპლომატმა განაცხადა, რომ გიორგი კვირიკაშვილი საკმაოდ ძლიერი ეკონომიკური მენეჯერი აღმოჩნდა, რომლის მთავრობა სულ რაღაც 8-10 თვე ფუნქციონირებს, მაგრამ საკმაოდ დიდ წარმატებას მიაღწია. ამ მთავრობის დამსახურებაა ხელისუფლების ესოდენ დამაჯერებელი გამარჯვება.
პატრიოტთა ალიანსის პარლამენტში შესვლაზე, იალოვიცის აზრით ის, რომ ამ პარტიამ მხოლოდ 5% დააგროვა, ნიშნავს იმას, რომ პოპულიზმი და ნაციონალიზმი საქართველოში არ მოიკიდებს ფეხს ისე ძლიერად, როგორც ზოგიერთ სხვა დასავლეთის ქვეყანაშია.
იალოვიცის თქმით, სამწუხაროა, რომ პარლამენტში ვერ მოხვდნენ „თავისუფალი დემოკრატები“ და „რესპუბლიკელები“. საწყენია, რომ უსუფაშვილი, საქართველოს ერთ-ერთი უძლიერესი პოლიტიკოსი, აღარ იქნება პარლამენტში.
„უახლოეს მომავალში საჭირო იქნება საქართველომ უფრო მნიშვნელოვანი როლი ითამაშოს რეგიონში. მნიშვნელოვანია, რომ საქართველომ გააგრძელოს აზერბაიჯანთან სტრატეგიული თანამშრომლობა.
დღეს რუსეთი ჩართულია უკრაინაში და სირიაში, და ნაკლებად სავარაუდოა, რომ უახლოეს მომავალში საქართველოს პირდაპირი აგრესიის საფრთხე ჰქონდეს. ამგვარად, საქართველოს აქვს „ამოსუნთქვის საშუალება“, თუმცა გასათვალისწინებელია რუსეთის ‘რბილი ძალის’ გაძლიერება. ეკონომიკურად საქართველო უნდა დარჩეს ისეთივე ღია და კონკურენტუნარიანი ქვეყანა, როგორც ის დღეს არის და შეეცადოს გახდეს საგარეო ინვესტიციებისთვის მეტად მიმზიდველი“,- განაცხადა კენეტ იალოვიცმა.