ირაკლი აბუსერიძე: “ნაციონალურ მოძრაობას” არ გამოსდის მძაფრსიუჟეტიანი ფილმების დადგმა და სჯობს, სერიალებზე იმუშაონ

30-მა კაცმა რომ 2 ადამიანი სცემოს, არა მგონია, მეორე დღეს გამოვიდნენ და პრესკონფერენციები მართონ – ამის შესახებ „ქართული ოცნების“ ვაზისუბნის მაჟორიტარი დეპუტატობის კანდიდატმა, ირაკლი აბუსერიძემ, ვაზისუბანში გუშინ მომხდარ ინციდენტთან დაკავშირებით განაცხადა.
აბუსერიძე მომხდარს „ნაციონალური მოძრაობის“ მიერ უნიჭოდ დადგმულ„მძაფრსიუჟეტიან ფილმად“ აფასებს და „ნაციონალური მოძრაობის“ წევრებს, სტრატეგიის შეცლას ურჩევს.
მისივე განცხადებით, ინციდენტში შტაბის არცერთი წევრი არ მონაწილეობდა.
„ნაციონალურ მოძრაობას“ არ გამოსდის მძაფრსიუჟეტიანი ფილების დადგმა და სჯობს, სერიალებზე იმუშაონ. ჩემს შტაბში ვიმყოფებოდით, გავიგეთ რაღაც ყვირილი და როცა გარეთ გამოვედით, ადგილზე მობილიზებული იყო დაცვის პოლიცია. გოგა ონიანმა განაცხადა, რომ მაღაზია იყო 100 მეტრით დაშორებული, ეს არის მორიგი სიცრუე. პირველ სართულზე არის მაღაზია, აფთიაქი, მეორეზე კი ჩემი შტაბი, სადაც ბანერი და „ქართული ოცნების“ ლოგოა გამოკრული. მარკეტის თანამშრომლებიც აცხადებენ, რომ ეს პირები იყვნენ ნასვამები. გამოსვლის შემდგომ ჯერ ერთ მოქალაქეს მიაყენეს შეურაცხყოფა, შემდეგ მანქანა დაუზიანეს. ჩვენ რომ გამოვედით, ინციდენტი ამოწურული იყო, რადგან აქ დაცვის პოლიცია იყო უკვე მოსული. „ნაციონალურ მოძრაობას“ არ გამოსდის მძაფრსიუჟეტიანი ფილმების დადგმა და სჯობს სერიალებზე იმუშაონ. 30-მა კაცმა რომ 2 ადამიანი სცემოს, არა მგონია, მეორე დღეს გამოვიდნენ და პრესკონფერენციები მართონ. მათ სურთ დესტაბილიზაციის შეტანა, მაგრამ ვცდილობთ, რომ რაც შეიძლება მშვიდად გაიმართოს ყველაფერი”, – განაცხადა აბუსერიძემ.