“პარტია იქნება შენარჩუნებული, გადახალისებული და გაძლიერებული. აუცილებელია, რომ პარტიამ გააგრძელოს მუშაობა და თქვენ ნახავთ, რომ მომავალში ძალიან აქტიურად ვიმუშავებთ. უახლოესი დღეები ჩვენთვის არის ძალიან ტექნიკური და პროცედურული საკითხების მოსაგვარებლად. რაღაც ვალები გვაქვს გასასტუმრებელი, უნდა შევხვდეთ ადამიანებს, გავიგოთ, ვინ რჩება და ვინ არა პარტიაში, თუმცა მისი ძირითადი ბირთვი შენარჩუნებული იქნება“, – აცხადებს “თავისუფალი დემოკრატების” წევრი ნინო გოგუაძე გაზეთ “რეზონანსისთვის” მიცემულ ინტერვიუში, სათაურით ნინო გოგუაძე – “ალასანიამ გადაწყვიტა, რომ არჩევნებზე პარტიის მარცხი მისი ბრალი იყო.”
“ჩვენ ვართ ოპოზიციური პარტია და აუცილებლად გავაგრძელებთ ბრძოლას, მითუმეტეს იმ ვითარებაში, რომელიც დღეს მივიღეთ. სახეზეა ერთპარტიული დიქტატურა და აბსულუტურად შეუზღუდავი ძალაუფლება. ამიტომ აუცილებელია, თავისუფალი სივრცეები გადავარჩინოთ და მათი კონსოლიდაცია მოხდეს. რადგან საქართველოს მომავალო არა საბჭოთა კავშირშია, რომელიც დღეს მივიღეთ, არამედ ევროპული, თავისუფალი და დემოკრატიული სახელმწიფოების გვერდით არის. ამისთვის კი “თავისუფალი დემოკრატები” აუცილებლად ვიბრძოლებთ. რაც შეეხება გავრცელებულ ინფორმაცს, რომ თითქოს პარტია ვიქტორ დოლიძემ, ზურა აბაძიძემ, გია ცაგარეიშვილმა და ირაკლი ჩიქოვანმა დატოვეს, ამ ინფორმაციას ნამდვილად არ ვადასტურებ, არც ერთ ამ ადამიანს არ უთქვამს, რომ პარტიას ტოვებს. ამიტომ მსგავს ინფორმაციას მე ნამდვილად ვერ დაგიდასტურებთ”, – აცახდებს რესპონდენტი.
“რაც შეეხება თქვენ კითხვას, თითქოს ვიქტორ დოლიძე, შესაძლოა, ევორონტეგრაციის მინისტრად დაინიშნოს, ეს ინფორმაცია მეც პრესიდან გავიგე. ძალიან რთულად წარმომიდგენია ასე სწრაფად იმ ხელისუფლებაში გადასვლა, რომელსაც ჩვენ ასე ვებრძოდით და რომელსაც ბრალს მურუსიძის სასამართლოს შექმნაში ვდებთ, ასევე პოლიტიკური პატიმრების ყოლაში, მათ შორის კაბელების ბიჭები დღეს ისევ ციხეში არიან. ასე რომ, მე ეს არ ვიცი, ვერც დაგიდასტურებთ ვერაფერს და არც წარმომიდგენია მსგავსი რამ. ჩემი ნათქვამიდან გამომდინარე მიხვდებოდით, რომ პარტია “თავისუფალი დემოკრატები” “ქართულ ოცნებასთან” არანაირ თანამშრომლობას არ აპირებს. რაც შეეხება ირაკლი ალასანიას გადაწყვეტილებას, ეს მისი უმძიმესი პიროვნული გადაწყვეტილება იყო. მე, მაგალითად, კატეგორიული წინააღმდეგი ვიყავი, რომ მას ეს ნაბიჯი გადაედგა, თუმცა ალასანიამ გადაწყვიტა, რომ ამ არჩევნებზე პარტიის მარცხი მისი ბრალი იყო. მან თავის თავზე იტვირთა ეს მარცხი. ირაკლიმ თქვა, რომ ვერ შეძლო, პარტიას გამარჯვებით დაესრულებინა ეს არჩევნები და ამ ეტაპზე ასეთი პასუხისმგებლობით გავიდა პოლიტიკიდან. დიახ, მან აიღო ეს პასუხისმგებლობა და იტვირთა ეს, ძალიან ბევრი იმ სახელმწიფო თანამდებობის პირისგან განსხვავებით, რომლებიც პასუხისმგებლობას იღებენ, მაგრამ არანაირ ქმდებას მას არ აყოლებენ”, – ამბობს “თავისუფალი დემოკრატების” წევრი.
“მე მესმის ყველა ამ ადამიანის. სწორედ ამიტომ ვამბობ, რომ აუცილებელია მათთვის ვიბრძოლოთ. ამიტომ ვრჩები მე ამ პარტიაში, მის გასაძლიერებლად და ამ ადამიანებს იმედს ნამდვილად არ გავუცრუებთ. პარტიაში ახალ სახეებსაც იხილავთ, ოღონდ მომავალში. ჯერ შიდა პრობლემები გვაქვს გადასაწყვეტი, ამის შემდეგ კი ჩვენ ფართოდ გავხსნით კარებს და ყველა ლიბერალურ ძალასთან გვექნება ურთიერთობა, მათ შორის ყველა იმ ადამიანთან, რომელსაც საქართველო საბჭოთა კავშირი არ ჰგონია. ჩვენს ქვეყანაში აუცილებელი იქნება ასეთი ადამიანების კონსოლიდაცია, ასე რომ პარტია ყოველთვის ღია იქნება ამ ადამიანებისთვის”, – დასძენს ნინო გოგუაძე.