აპრილში სააკაშვილი მოითხოვდა მის პრემიერად დანიშვნას და პოროშენკოს ულტიმატუმი წაუყენა, – აცხადებს for.ge-სთან საუბრისას საქართველოს განვითარების ლაბორატორიის ხელმძღვანელი ირაკლი გოგავა:
“თავიდან სააკაშვილი გამოყენებულ იქნა, როგორც ავი ძაღლი, რომელსაც მიუქსევდნენ ოლიგარქებს და შემდეგ ამ ოლიგარქებთან უკრაინის პოლიტიკური ელიტა ალაგებდა ურთიერთობებს. გვახსოვს კოლომოისკიზე, ფირტაშზე, ახმეტოვზე და სხვებზე შეტევები. დღეს კი სიჩუმეა და სააკაშვილი ქარხნის დირექტორის მოადგილის, საბაჟოზე ცვლის უფროსის და ბაზრობის დირექტორის დონეზე აკრიტიკებს ხალხს. აპრილში სააკაშვილი მოითხოვდა მის პრემიერად დანიშვნას და პოროშენკოს ულტიმატუმი წაუყენა. ხოლო შემდეგ დაიწყო საკუთარი პარტიის შექმნის პროცესი.
ამას მოყვა ის, რომ სააკაშვილი დაიბარეს პრეზიდენტთან, ააყუდეს კედელთან და მკაცრად უთხრეს, რომ ის არ უნდა ჩარეულიყო უკრაინის პოლიტიკურ პროცესებში და ფოკუსირება მოეხდინა ოდესის ოლქზე. ამბობენ, რომ გაბრაზებულ პოროშენკოს მაშინ უთქვამს, თუ არ გაჩერდები მოლდოვაში ელჩად გაგიშვებო. მას შემდეგ სააკაშვილი „დამჯერედ“ იქცევა და უკრაინის პოლიტიკას არ ეხება. შეუმცირეს ეთერი ცენტრალურ არხებზე და შესაბამისად მისმა რეიტინგმაც „ჩაყვინთა“. დღეს სააკაშვილის რეიტინგი 3-5%-ის ფარგლებშია. რეფორმები ჩავარდა, ოდესის საბაჟო კრიზისშია, ტვირთების განბაჟება სხვაგან ხდება.
ოდესელები ამბობენ, რომ რეფორმის შედეგად კორუფციული ტარიფები გაათმაგდა. თუ ადრე კონტეინერის „გაპრავებაში“ 300-400 დოლარს იხდიდნენ, დღეს იგივე 2000 დოლარამდე უჯდებათ და ეს სქემა კეთდება საბაჟო ბროკერების მეშვეობით, სადაც მხოლოდ სააკაშვილის ხალხია დასაქმებული. ოდესის ოლქის მაჩვენებლები დაეცა ყველა მიმართულებით და მოწინავე რეგიონიდან მაჩანჩალებს შორის აღმოჩნდა”, – აცხადებს გოგავა.