პარლამენტის მაჟორიტარული საარჩევნო სისტემით არჩევნების მეორე ტურს ცესკო ხვალ ოფიციალურად დანიშნავს. როგორც „კვირას“ ცენტრალური საარჩევნო კომისიიდან აცნობეს, ხვალინდელი სხდომა 11.00 საათზე დაიწყება, სადაც დღის წესრიგით გათვალისწინებულია 8 საკითხი. განსახილველ საკითხთა შორის, განსახილველია ასევე თვითმმართველი თემების გამგებლების მეორე ტურისა და პარლამენტის 2016 წლის 8 ოქტომბრის არჩევნებისათვის განმეორებითი კენჭისყრის დანიშვნის საკითხები.
გარდა ამისა, ხვალინდელ სხდომაზე საქართველოს პარლამენტის 2016 წლის 8 ოქტომბრის არჩევნებისათვის სხვა სახელმწიფოში შექმნილ საარჩევნო უბნებში გამართული კენჭისყრის შედეგების შეჯამების თაობაზეც იმსჯელებენ.
ცენტრალურ საარჩევნო კომისიაში სხდომა ხვალ 11:00 საათზე დაიწყება.
ცენტრალურმა საარჩევნო კომისიამ მეორე ტურების და განმეორებითი კენჭისყრის შესაძლო თარიღები რამდენიმე დღის წინ განსაზღვრა. 8 ოქტომბრის პარლამენტის არჩევნების მეორე ტურები 50 მაჟორიტარულ საარჩევნო ოლქში სავარაუდოდ 30 ოქტომბერს გაიმართება. რაც შეეხება განმეორებით კენჭისყრას, ის 22 ოქტომბერს იგეგმება.