ექსპერტ მამუკა არეშიძის განცხადებით, ნაციონალური მოძრაობის მხრიდან საუბარი, რომ ხელისუფლების მიერ საკონსტიტუციო უმრავლესობის მოპოვება საფრთხეს წარმოადგენს, არის მცდელობა დააშინონ და გადაიბირონ ამომრჩეველი.
“ნაციონალურ მოძრაობას თავის დროზე თვითონ რომ არ ჰქონოდა საკონსტიტუციო უმრავლესობა და არ გამოეყენებინა თავისი სურვილის მიხედვით, კიდევ იფიქრებდა კაცი, რომ ესენი ქვეყანაზე ზრუნავენ და ამ თემას უდგებიან ისე, როგორც დემოკრატიულ ქვეყნებში ხდება. თვითონ ჰქონდათ საკონსტიტუციო უმრავლესობა და რასაც უნდოდათ, იმას აკეთებდნენ. აქედან გამომდინარე, ეს უბრალოდ საფრთხობელაა იმისთვის, რომ როგორმე მოსახლეობა შეაშინონ და გადაიბირონ”.
ჟურნალისტის კითხვაზე, თუ საზოგადოების რა ნაწილზეა ეს გათვლილი, არეშიძე პასუხობს.
“განსაკუთრებით მათზე, ვინც სხვა პარტიებს უჭერდა მხარს. მოიყვანონ ისინი არჩევნებზე და სათავისოდ მიაცემინონ ხმა. სხვა ლოგიკას მე მათ ქმედებაში ვერ ვხედავ. საინტერესოა ის ფაქტიც, რომ ვრცელდება ესემეს გზავნილები ტელეფონებზე, ამომრჩევლებზე”.
– ვისი მხრიდან?
”რა თქმა უნდა, ნაციონალების. ნაცმოძრაობის მაჟორიტარი დეპუტატი ესა და ეს ავრცელებს მოწოდებას, რომ მხარი დაუჭირონ მას, როგორც ოპოზიციის წარმომადგენელს. წერია მისი გვარი ესემესში, მაგრამ არსად წერია, რომ ის ნაციონალური მოძრაობის წარმომადგენელია. ეს-ემ-ეს-ში წერია, რომ არა ძალადობას, არა ხელისუფლების უზურპაციას, მხარი დაუჭირეთ ოპოზიციის კანდიდატს.”- აცხადებს არეშიძე გაზეთ “ახალი თაობისთვის” მიცემულ ინტერვიუში.