თბილისის მერიის მედიასთან ურთიერთობის სამსახურის უფროსი მანანა თოქმაჯიშვილი სოციალურ ქსელში პოსტს აქვეყნებს.
“დედაქალაქის სიახლეები თბილისის მთავრობის სხდომიდან:
✅მუნიციპალიტეტის ბიუჯეტმა მომდევნო წლების განმავლობაში, შესაძლოა მილიარდ 700 მილიონ ლარს მიაღწიოს. გაზრდილი ბიუჯეტი ნიშნავს შესაძლებლობას, ინფრასტრუქტურული, ჯანდაცვისა და სოციალური თუ სხვა მიმართულებებით, კიდევ უფრო მეტი პროექტი განხორციელდეს და რაც მთავარია, მეტი დახმარება მიიღონ იმ ოჯახებმა, რომელთაც თანადგომა სჭირდებათ. კახა კალაძემ პრემიერ-მინისტრ ირაკლი ღარიბაშვილს მხარდაჭერისა და თანადგომისთვის მადლობა გადაუხადა.
✅პარლამენტმა მესამე მოსმენით მიიღო საკანონმდებლო ცვლილება, რომელიც ამარტივებს სამშენებლო პროცედურებს ინდივიდუალური საცხოვრებელი სახლებისთვის. კერძოდ, მოიხსნა საეტაპო ოქმების წარდგენის ვალდებულება. რაც შეეხება არაინდივიდუალურ სახლებს, ნებართვის მფლობელები საეტაპო ოქმების წარუდგენლობაზე პასუხისმგებლობისგან გათავისუფლდნენ 2022 წლის პირველ იანვრამდე, თუმცა, მათ დარჩათ ვალდებულება, საეტაპო ოქმები და საჭიროების შემთხვევაში, დასკვნები წარადგინონ. აღნიშნული საკანონმდებლო ცვლილებით, მოქალაქეებისთვის შემცირდება ბიუროკრატიული პროცედურები და ფინანსური ხარჯი, თუმცა, ეს არ ნიშნავს იმას, რომ სამშენებლო პროცესის კონტროლი შესუსტდება.
✅თბილისს კიდევ ერთი რეკრეაციული სივრცე შეემატა, არტურ ლაისტის ქუჩაზე, 5200 კვ.მ ფართობზე დასასვენებელი და გასართობი სივრცე მოეწყო. თბილისის მერის განცხადებით, მომდევნო ოთხი წლის განმავლობაში, რეკრეაციული სივრცეების პროექტების განხორციელებას განსაკუთრებული ყურადღება დაეთმობა.
✅20 ნოემბრიდან თბილისის საზოგადოებრივი ტრანსპორტის ქსელს ახალი მიკროავტობუსების მარშრუტები ემატება. ახალი მარშრუტები ძირითადად ისეთ უბნებში ინიშნება, სადაც ტრანსპორტის პრობლემა განსაკუთრებით მწვავედ იდგა. კერძოდ, N421, N441, N443, N446. ეს იქნება მეტროსადგურ „გურამიშვილიდან“ ზღვისუბანთან დამაკავშირებელი, სოფელი დიღმიდან საბურთალოსა და მთაწმინდის რაიონებთან დამაკავშირებელი, ასევე, სოფელ დიღმიდან სოფელ დიდგორსა და თელოვანთან დამაკავშირებელი მარშრუტები. ახლად რეაბილიტირებულ ინგუშეთისა და მაისურაძის ქუჩებზე ინიშნება მარშრუტი, რომელიც ამ ქუჩებს მეტროსადგურ „ახმეტელის თეატრთან“ დააკავშირებს.
✅თბილისში საახალწლო დეკორაციების გასაახლებლად, სამი ტენდერი გამოცხადდა. მათ შორის, ორი საახალწლო აქსესუარებისა და განათებების, ხოლო ერთი – საახალწლო თემატიკის დეკორატიული მატარებლის შესყიდვას ემსახურება. სამივე ტენდერის ღირებულებაა 207 000 ლარია. დედაქალაქის მერის თქმით, არცერთი ტენდერი დედაქალაქის მთავარი ნაძვის ხის განახლების ან შეცვლის მიზნით არ გამოცხადებულა. ამასთან, კახა კალაძემ ბიზნესსექტორის წარმომადგენლებს მოუწოდა, დედაქალაქში სხვადასხვა ადგილი საახალწლოდ მორთონ.
✅თბილისი – წიგნის მსოფლიო დედაქალაქის“ ფარგლებში, გალაკტიონ ტაბიძის დაბადებიდან 130 წლის აღსანიშნავი საიუბილეო კვირეული ჩატარდება. დღეს, 17 ნოემბერს, 18:00 საათზე, გიორგი ლეონიძის სახელობის ქართული ლიტერატურის სახელმწიფო მუზეუმის ორგანიზებით, ახალი ექსპოზიცია გაიხსნება.
✅10 ნოემბერს საზეიმოდ გაიხსნა დედაქალაქის მერიის მიერ დაფუძნებული თბილისის საერთაშორისო თეატრალური ფესტივალი, რომლის ფარგლებში, 20 ნოემბერს, დედაქალაქს კიდევ ერთხელ ეწვევა საპატიო მოქალაქე მიხეილ ბარიშნიკოვი. ფესტივალის ფარგლებში, მაყურებელი ნახავს მის მხატვრულ ინსტალაციას, ფილმს „არც ერთხელ“”